لو بيحبك بجد .. لازم يعمل كده

بيحبك . بيحبك قوى يعنى . انتى متأكدة وعندك ثقة مطلقة فيه . بتصدقيه . وعندك احساس انه بيقول الحقيقة وانه فعلاً بيفكر فيكى فى كل دقيقة وكون انه يبعد عنك استحالة وانك حبيبته الوحيدة لأخر العمر
ماشى انا كمان ح اصدقه واصدقك
بس تعالى برضه نتكلم بالعقل ونسيب لغة المشاعر والقلوب والهيام على جنب ونفكر
من قد ايه وحضرتك مرتبطه بحضرته ؟
من قد ايه بيقولك بحبك ؟ بيقول وبس وهيفضل لحد امتى يقول وخلاص ؟ وامتى ممكن ياخد خطوة ايجابية تنقل الحب ده من عالم الكلام والخيال الى ارض الواقع والفعل ؟ ولا سعادته ناوى يقضيها كلام وفسح وخروج وسعادتك فرحانة بالكلام الحلو والاشتغالات دى كلها وعاملة انك مش فى دماغك وفاكرة انك عايشة اعظم قصة حب وانتى عايشة فى وهم كبير وخديعة محكمة وظنون ليس فيها من الواقع شئ
ومصدقة وعندك يقين ان حبيب القلب اول ما تيجى الفرصة مش هيضيع وقت وبسرعة يخطبك . يعطف عليكى بعد صبر وانتظار ويقابل الوالد ويفرحك
ارجوكى عشان خاطر نفسك اعيدى التفكير مرة اخرى شوفى قد ايه من عمرك ضاع وانتى بتسمعى الكلام ده ومفيش حاجة بتحصل حبيب القلب عاجبه الحال على كده بيقول بينه وبين نفسه الف حمد والف رضا وبكرة تتعدل وصبره طويل والظاهر مفيش له اخر وانتى عايشة فى وهم وفاكره انه حب بس الحقيقة انه مستحيل يكون حب
لو بيحبك بجد لازم ياخد خطوة ايجابية ادينا بنقول تانى
لو بيحبك بجد و مش بياع كلام لازم يخبط على بابك ويضع يده فى يد الوالد قبل ما يفكر يقولك بحبك ده لو بيحبك
وسامحينى لو كلامى كان مؤلم بس هى دى الحقيقة وانا عاوز مصلحتك

أحمد صلاح محمود