رسالة صريحة للرئيس بوتفليقة

مرسلة من صديقة نورت son-son

كواطنة جزائرية يشرفني أني أراسل فخامتكم مع العلم بأنني لن أتلقى رداً، لأني لم أسمع إلى يومنا أن رئيس دولة عربية أجاب عن رسالة مواطن
رسالتي بالعامية الجزائرية وارجو ان تكون مفهومة
فخامة رئيسنا الكل يتكلم عن انجازاتك الكبرى بصح ماعرفناش واش هي ؟؟؟؟ من اللي وصلت لدزاير عرفنا كل الامراض الخطيرة، تزوير الانتخابات، الرشوة، المحسوبية، الاختلاس……………

واحد شعبي من هذ البلاد يشوف ويسمع ويعيش الواقع بصح ما ينجم يدير فيها والو على خاطر الدمينو مغلوق.
سيد الريس من لي نشفا على روحي وهوما يقولولنا دوك تتسڤم ويقولولنا سخنوا الحالة سخنا حتى نحرقوا يدينا وفي الاخير ماكان والو.
سيد الرايس البلاد اللي راك انت المعلم الكبير نتاعها راهي مرونة
سيد الرايس رانا ما عرفنا لمن نشكيو وماعرفنا لمن نبكيو؟؟ سمعنا بلي راك انت الرجل الاول في البلاد وانت القاضي الاول في البلاد وانت قلبك مفتوح لشعبك وخاوتك سيدالريس بكينا حتى نشفوا دموعنا وصبرنا حتى فوق الحد وسكتنا حتى رجع سكاتنا مرض، كاين اللي هبل وكاين اللي همل وكاين اللي قتل وحرق روحو وكاين اللي بدل دينو وكاين اللي طلق مرتو وكاين اللي باع ولادو وكاين اللي ضرب امو وكاين اللي شاب قبل الوقت
سيد الرايس حب بلادنا رشانا والحقرة في بلادنا حرقتلنا قلوبنا
سيد الرايس علاش راهم يسرقوا فالمال العام؟ وشكون هذوا اللي هاجوا علينا كيما هجوج ومجوج؟؟ سيد الرايس الفوضى دهشتنا ورجعتنا مانفهمو والو،
سيد الرايس شكون اللي يحمي عرضنا وشكون اللي يوقف ويجيبلنا حقوقنا؟؟ شكون اللي يرجع الامور للسكة؟؟ بلا بيك ياسيدنا

.سيد الرايس راني اللي نتلاقى بيه من شعبك نلقاه هابطلو المورال.. واحد الانسان وجهو مغبر وعينيه داخلين في راسو ، سيد الرايس شعبك ذلوه طحنوه رخصوه عراوه ضحكو عليه لجناس وبهدلو بيه قدام اللي يسوا واللي مايسواش. سيد الرايس رانا ندعو لك ربي يحفظك ويعطيك صحتك ويوفقك باش تصلح البلاد وتعمل الشي اللي عجزوا عليه اللولين ،
سي الرايس حبينا منك تسوي اوضاع الشعب ووتعاود النظر في الشهريات ومستحقات الشعب واحكم بالعقل والمنطق
كيفاه تحدد اجر المجاهدين بقيمة خيالية وتحدد اجل الموظف العمومي بقيمة بخسة كانو يعمل عند مستعمر المفارقة العجيبة مجاهد واي مجاهد فوالله نسبة صدقهم 90/100 كاذبة
مجاهدون وهما ماجاهدو ولا شاركو لا من قريب ولا من بعيد في الثورة داو الشيعة باطل
علابالنا انها منحة لكسب اصوات في الانتخابات فكفاكم ضلما وجورا في ارضنا

اما المعلمون ااااااااخ من التعليم اساتذة شهريتهم كنوز بالنسبة لعمال ما يعرف بالشبكة الاجتماعية نعم نحترم العلم واهله لكن هيهات واي تعليم يا بوتفليقة اساتذة همهم المادة ورصيدهم المعرفي 0
سيدي الرايس هل يرضيك يصير كل هذا في بلاد غنية بالبترول
سيدي الرايس
اعد النظر في كل هذا واحذر ثورة الشعب يوما ما ……………..