بسم الله الرحمن الرحيم
يا ترى شباب مصر نفسهم بإيه ؟؟؟ … وبيحلموا بإيه ؟؟…. أمنيات خاصة وعامة لكنها بسيطة
فلماذا سرق من حكموا مصر أحلام هؤلاء الشباب ؟؟
لم أجد أحداً يحلم بقصر شامخ أو سيارة آخر موديل أو ملايين بالبنوك ، ولكنها كلها أمنيات
بسيطة طبيعية حولها نظام فاسد إلى أحلام …
عندما يموت الأمل بعيون الشباب .. وتدخل المطالب الحياتية العادية لتصنيف الأحلام والأمنيات
فكان لابد من الثورة لتثبت للعالم أن هؤلاء الشباب كانوا بركاناً لابد له من الإنفجار .. ليقذف
بحممه لتجتاح كل من سلبوهم حرياتهم وقتلوا أحلامهم ..
لقد نقلت تعليقات الشباب على الفيس بوك كما كتبوها بأيديهم .. ووددت مشاركتكم بنورت عما
يتمناه شباب مصر .. وهذه عينة من هؤلاء الشباب ..
أترككم مع الموضوع
تحياتي لكم .
****************************
حسين مبروك
انا نفسي ارجع مصر واشوف بنتي وصلت للدنيا بالسلامه واعملها السبوع بتاعها بنفسي او احتفل معاها باول عيد ميلاد ليها واقدر اعيشها عيشه كريمه في مصر ونستقر ونتعب في بلدنا ومنسافرش السعوديه تاني
محمود المصرى المصرى
بحلم اكون انسان ..ومكنش غريب على ارض بلدى مصر .وخيرها يكون يكون لكل ولادها مش 10 %تقريبا يمتلكو كل البلد. والباقى اما هه عايش او بيصارع الحياة مهما كتبت الصفحة مش تكفى احلامى.بس نفسى بأدينا نحقق الحلم يبقى حقيقة
Ahmad Al Swaidy
نفسي الناس تتغيرمن جواهابجد ويفهموا قول الله
إن الله لا يغير ما بقوم حتى يغيروا ما بأنفسهم
Salma Salem
نفسي باقي ال٩٥٪ من الشعب يتغير.. لاني شايفة ان اللي اتغيروا بجد ٥٪ او اقل كمان.. نفسي الامية تختفي..البطالة..الرشوة..الصراع والبلطجة..الزيادة الرهيبة ف الاسعار.. وزي ما قلت احترام الناس اهم حاجة.. يعني نفسي الاقي المنقبة ماشية جنب اللي بشعرها ومتقبلين بعض.. ويا رب مصر تبقى ام الدنيا بجد وحقيقي
Yasoo Smsm
انا كمان نفسى اوى البلد والناس بقى يتغيرو لاننا خلاص دخلنا مرحلة وحياة جديدة خالص وتكون مصر احلى واحسن بلد فى العالم زى ماهى طول عمرها
Ramy Duo
وانا نفسي كابن أم مصرية وفلسطيني أحمل الجنسية المصرية علشان أقدر أعيش وأتعلم في بلد أمي وبلدي التانية أم الدنيا وأنا حر وزي زي أي مواطن مصري عايز يرفع اسم بلده لفوق ونفسي ادخل مصر بدون تأشيرة وباسبورد وبدون تنسيق امني مع الصهيون هو ده اللي نفسي فيه 🙂
Ahmed Hassan Mohammed
نفسي الناس تلتزم لوحدها بدون رقيب عليها…..نفسي الناس تفهم إن الثورة قامت علشان الحرية مش البلطجة…..نفسي المسلم و المسيحي يعرفوا انهم فعلا سند لبعض….
Saher Saad
نفسى اوووى انى اشوف مصر احلى بلد فى العالم ………….. ونفسى نحرر المسجد الاقصى واصلى فيه …………………… يا رب تتحقق كل الاحلام
Hussam Taha
نفسي نرجع نحب بعض زي الاول مش عشان حاجه لكن بس عشان بنحب بعض . ونفسي يبقي اللي بنبينه للنااس يكون فعلا اللي جوانا خلاص الحواجز اتكسرت يوم 25 يناير مفيش خوف مفيش نفاق مفيش واسطه مفيش اهانه نفسي اشوف عكس الكلمات دي كلها ونفسي اوي ان يبقي للان…سان كرامة بجد نقول راينا من غير خوف مسلم مسيحي اخوان سلف يا جماعه كفايانا انقسامات ياريت نرجع نحب ونخاف علي بعض فبالحب نحيا ان قدر لنا البقااء وبالحب تثقل موازيننا يوم نلقي الاحبه……..
Hadia KB
Inshalla all ur dreams come true .. Ameen ya rab
AbdelRhman Hammam
ان شاء الله هنحقق الحلم ده قريب جدا و هتكون مصر اكبر دولة في العالم
يا رب احفظ مصر و اهدي اهلها
Ahmed Samir
نفسى كل شباب مصر يكونوا من نفس نوع شباب 25 ينايروكل اجيال مصر الجاية
م.هاجر صلاح
نفسى الصحرا نستفيد منها صح
Asamma Asmma
نفسي نوحد جهودنا وطاقتنا للبناء مع بعض زي ما كلنا اتوحدنا في مطلب الهدم نكون عندنا ثقافه للبلد مش المهم نفسي ونفسي بلدنا تكون احسن بلد بجد تستحق بس التوحد
Walid Hussein
وجهه نظرى مختلفة شويه / لا بالكلام ولا بالحلم ونبدا نقول الي بدانا نعمله فعلا كلا في مجاله مهما كان صغير غيري كتير بدا وانا واحد منهم هوة دة الى لازم نتكلم فيه ونقول بنعمل ايه وغيرنا ايه والعقبات الى بتواجهنا ايه / ياريت يبقي فيه صفحه باسم احنا بدأنا نغير احنا بدنا نعمر ونشوف ونسمع بعض علشان نوصل باسرع وقت ايد في ايد
Sameh Abd Alwhab
الصبر
Ayman Khalifa
نفسي اقول للعالم كله عملنا الثورة وحمينا البلد وبنينا مستقبلنا بجد البلد دي عاوزه كل واحد يبني و مينتظرش حاجة دلوقتي احنا بقينا فرق وطوائف يا رب استرها علي البلد دي
Romany Grais
نفسى مسيحى ومسلم يبقوا حاجة واحدة والدين لله والوطن للجميع
حكيم مهدي
نبقي احسن دولة في الخلق والعلم
Koky Koka
نفسي احلامك تتحقق يا ادمن لانها شامله كل احلامنا
Amr Hosny
نفسي زي من طالبى العلم وطالبى الحرية والرخاء والديمقراطية الى فى العالم كلوا يحلموا انهم يجوا مصر وياخدوا الجنسية زي ما حلم كل شاب مصري انوا يسافر ياخد جنسية امريكية او غيرها يبقى العكس
Wiza Gamal
طبعا كلنا نفسنا تتحقق كل الاحلام دى بس مش هتتحقق واحنا قاعدين مكانا لازم نعمل ونجتهد عشان نحققها وابسط انواع الاجتهاد ان كل واحد يعمل بجد واتقان فى مجال عمله عشان ربنا يكرمنا
احمد العدل
ياجماعهة اقسم بالله ان مصر هتبقي احسن دوله في العالم بمجهودنا
Asmaa Elsawy
نفسى احس بالامان والاطمئنان فى كل شوارع مصر
Noor Magdy El Fawal
تححححححححححححححححححفه وان بحلم والحلم مش مستحيل ان شاءالله قريب اوي اوي
Abo Amr Ghanim
ورق امريكا كله اتكشف والاحتلال بيغير جلده زي التعبان ونفسي نعرفه ونفسي
نعرف عدونا الحقيقي
Nosa Hafth
الله الله الله عليكم كلكم يا شباب مصر من احسن الدول فى العالم بيكم كلكم يالا بينا نعمر نبنى نحب كل شبر فى ارض مصر
Nesreen Mahmoud
نفسي يكون في تسامح بين الناس وكل واحد بقى حاسس بغيره
Shady Adel
نفسي الاقي شغل محترم بمرتي حلو بعد ما اخلص كلية
ونفسي ماشوفش اطفال صغيرة بتشحت في الشارع
نفسي ماشفش ناس نايمة بليل على الرصيف عشان ماعندهمش مكان يناموا فيه
Mody Rabie
نفسى كل المصريين يعرفوا يقرؤا ويكتبوا عشان يفهموا هما عايزين أيه ورايحين فين وميخبت على بابه واحد صينى يعرف يتعامل معه
Nahed Saber
نفسى نعرف نربى ونعلم ولادنا كويس وأنه تكون المدارس على مستوى قوي من العلم نفسى مكونش خايفة على ولادنا من الأنحراف ومكونش متوجسة خيفة من مستقبلهم .نفسى أقدر أوفرلهم كل سبل الحياة من علم ودين وأخلاق
Yasser Abdolghany
عارفين يا جماعة .. زي ما كانت الثورة دي حلم مجنووووووووووووووووووون .. ان شاء الله كل اللي بتقولوه ده هيبقى حقيقة وهيتحقق .. فلسطين هاتتحرر .. الدول العربية هاتتحد .. المصرييو هيكونوا ايد واحدة .. أنا هاتجوز ان شاء الله :'(
Roma Mohamed
عارفين انا حلمى انا وخطيبى نتجوز تخيلوا بقالنا سنتين انا وهو مموتين نفسنا من الشغل ومش عارفين نتجوز علشان عندنا عجز حوالى 10000 جنيه ومش هنقدر نجمعهم غير بعد سنه تقريبا علشان الجمعبات اللى اتقبضت لسه مش هتخلص دلوقتى بالرغم ان فيه ناس متعبتش فى اى حاجه بتصرف فى اليوم أكتر من ال10000 جنيه دول بكتير
حسبى اللى ونعم الوكيل فى اللى سرق الشعب كله ووصلنا للحال ده
Amr Reda
نفسى العالم يتغير .. نفسى يبقى فيه عدالة و مساواه .. نفسى الحق يرجع لأصحاية ,, نفسى احس ان مافيش حفنة من البشر ممشيين العالم على مزاجهم .. نفسى نحترم الأرض اللى بنعيش عليها و المية اللى بنشربها و الهوا اللى بنتنفسه .. و نبطل لنلوث فيهم علشان شوية ناس تحشى جيوبها فلوس .. نفسى نبطل نتعامل مع الأرض على انها صفيحة الزبالة بتاعتنا .. نفسى نورث الدنيا لأولادنا و احفادنا اجمل مما ورثناها مش اسوأ و اقذر ..
Alnasser Mohamed Marwan
الله على الأحلام دي . نفسي كل ده يتحقق في بلدي والله كل ده لو اتحقق لتكون بلدنا احسن بلد في الدنيا وأقوى بلد كمان بس يا ريت كل مصري يعرف الكلام ده كويس ويحاول يطبقه على نفسه و أسرته صدقوني بلدنا حتبقى اعظم بلد في الدنيا . انا شايف إن دور ال…شباب المتعلم يوصل كل ده لكل مصري في قرى ونجوع وصعيد مصر وياريت يدرس ده في مناهج التربية والتعليم مش مهم كل ده يتحقق في عصرنا المهم يتحقق في المستقبل علشان حياة افضل لاولادنا , تحيا مصر
Ghosoun Waheed
نفسي نبقى بلد شعبه كله ملتزم ومنظم أكتر من اليابان ، احنا عددنا كبير و ده مش عيب بالعكس دي حتبقى ميزة حلوة لو عرفنا ننظم نفسنا في كل حاجة ، نفسي شباب مصر ياخدوا فرصهم في بلدهم ويحسوا أن ليهم مكان فيها .. أنا سبت مصر لأني حسيت اني مليش مكان فيها و أن البلد دي مش بتاعتي و فكرت لو فضلت فيها عمري حيضيع هدر
ابو عبد الله
نفسي نترحم علي الشهدا ونفتكر انهم ضحو بحياتهم علشان اخنا نعيش مرفوعين الراس ونبني مص ونحب بعض ونبقي ايد وحده
Marie Georges
نفسى لما أنزل من بيتنا الصبح ألاقى الناس فى الشارع بتضحك…نفسى الناس تركن صح و تمشى صح…نفسى سواقين التاكسى يسمعو عمر خيرت و فيروز و بتهوفن و موتزارت…نفسى أقف فى اشارة مفيهاش اطفال بتشحت…نفسى نزرع ورد فى الشوارع….نفسى مشوفش ناس متشعلقة على باب المواصلات…نفسى كل حاجة تتعمل بضمير و اتقان…نفسى ننهى اى فتن بأيدنا و نحترم معتقدات الناس التانية و افكارهم
هى دى أمنيات بعض شباب مصر
مصر اللى هتفضل كبيرة بولادها
لأن الجميع يحبها بإخلاص ولا ينتظر منها المقابل
نفسى بلدى تبقى احلى بلد فى الدنيا وترجع لسابق عهدها..نفسى فى ريس يتقى الله فينا ويكون بيحب مصر بجد …يارب ماتشمت فينا حد لان للاسف اللى بيحقدوا على مصر اكتر من اللى بيحبوها
نفسى ان عيادتى اللى حفتحها فى بولاق تشتغل..بليز نورت ابقى ابعتيلى زباين ياختى
نفسى اولد واخلص بقى انا زهقـــــــــــــــت
سلامات يا فارس ..اخبار معاليك ايه؟؟؟
شيري اولا مساء الخير
ثانيا نحي من راسك ان في احد هايشمت في بلد عربي مهما كان والعياذ بالله
كلنا عرب وكلنا مسلمين و اكيد ان مس اي مسلم ضر في اي بقعه سيعنينا وسنتاثر له برغم كل السلبيات عن العرب اللي قلتها سابقا والله واحنا قاعدين في البيت لو شفتي منظر اختي لما شفنا الفيديو بتاع البنت التي سحلت وتصرفها لقلتي انها اكثر من مصرية لا احد يرضى بالظلم والهوان لاي بشر ولا لاي عربي ولا لاي مسلم بالخصوص. ونفسنا كل العرب تجتمع وتبقى احسن زي مافرحنا بتونس ربي يوفقهم
أهلا بكِ د. شيرين
الحمد لله بخير
وأتمنى أن تضعى حملك بالسلامة
ويرزقكم الله بمولود سعيد يملأ حياتكم فرحاً وسعادة
وبخصوص عيادة بولاق ماتقلقيش ، أنا ممكن أبعث
لك أكبر عدد ممكن من مصابي الثورة
وحبايبنا فى مصر كثير يقدروا يبعثوا المرضى لغاية عندك
بالتوفيق وبالسلامة إنشاءالله شيرين
اغلب الأمنيات انهم يغيروا من انفسهم وفعلا ده حال جل العرب فليس المؤسسة او الرئيس فقط الوحش بل الناس مع بعضيها وحشة ولو كل واحد اخد زمام الامور لتصرف العن من السابق
عقول العرب غلبت عليها كل شي غير التطور والرقي والحضارة الامن رحم ربي
غاب عن شارعنا العربي قول النبي عليه الصلاة والسلام ” من رأى منكم منكرا فليغيره بيده ، فإن لم يستطع فبلسانه ، فإن لم يستطع فبقلبه ، وذلك أضعف الإيمان .” وصار كل واحد لا يعنيه مايحدث
والسلام عليكم
وشعوبنا العربية يا حياتي اختاروا اضعف الايمان يغيروا بقلوبهم
أنا هأحجز عندك أول كشف يا شيرين
بس عشان إحنا أصدقاء .. هيبقى مجاناً
بعدها هأستشيرك فقط بالتليفون .. ههههههههه
أنا بأهزر طبعاً
ماشى يا فارس
انا عارفه انها مش حتجيب همها والله قلبى حاسس هههههههه
لا لا .. توكلي على الله
أنا أخويا شجعته على فتح عيادته وفى أول ثلاثة أشهر
كان الإيراد ضعيف لا يكفى راتب الفتاة اللى بتأخذ الكشف
ولا العامل بالعيادة ولكن بعدها فتح الله عليه وماشاءالله
إكتسب شهرة كبيرة فى ظرف سنة واصبح العيادة عنده
الآن لابد أن يأخذ المريض موعد قبلها بأسبوع
لا تترددى ، الدكتور الشاطر بيسمع إسمه بأسرع مما تتخيلي
ان شاء الله يا باشا
على فكرة ماينفعش تكشف عندى لانها عيادة اطفال وحديثى الولاده ههههههههههه
ههههههههههههههه
أوك شيرين يا بخيلة
أنا هأجيب ابن اختى والكشف مجاناً بردو .. ههههههههههه
هي احلام كل شباب العالم العربي وان شاء الله بيحققوها ان بعدت المسافة او قصرت ومشوار المية خطوة يبدأ بخطوة والشباب العربي بدأوا الخطوة
شكرا اخي الفارس
عزيزتي شيرين
الله كفيل بتحقيق أحلامك و اضم صوتي للأخ فارس فيما قاله عن العياده و عملها لن يضيع الله اجر المجاهدين
كل إمرأة تعمل تدرس و متزوجه باسم الله ما شاء الله تعتبر مجاهده
تمنياتنا القلبيه ل مصر و شباب مصر بالتوفق
نفسى مرة واحدة بس أكون نايمة، وماما ماتدخلش على الاوضة وتكلمنى اكنى صاحية، وتعتبر انى فهمت كلامها وبناءً عليه تحاسبنى تانى يوم وتقولى “أنا مش قولتلك تعملى كذا وكذا وكذا، مابتسمعيش الكلام ليه؟”.
هو ده حلمى.
مشكور فاااااااااارس