طالب عاشق وخايف

مرسلة من صديق الموقع فريد البدري

طالب وعايف دروسي ***** وأقرأ أشعار وجرايد
وعاشق بنية بقسمنة ***** والقلب الها رايد
هي حلوة ..هواي حلوة ***** وأني يا ناس شلون واحد
بالفرن ناسيني أهلي *****وحتى لون عيوني جارد
حاولت الفت نظرها ***** بكل وسيلة بس ماكو فايد
غيرت لبسي وحتى مشيتي ***** وفكري بسببها وصرت بالمودات شارد
وجللت شعري وحتى صبغته اشقر *****ولبست تراجي وحتى قلايد
كعدتني على الحديدة ***** وبسببها بعت حتى الحدايد
لاتقــــــلي ولا أقـــــلك *****بهذلتــــــني والله على كـلامي شاهد
وهي تدري بس خبيثة ***** وثولة ودلالها بارد
وانا نار بنص دليلي *****وخايف اصارحها وتعاند
مرة أقول احكي معاها ***** ومرة أقول خليني راكد
وين كانتلي يا ربي ***** مو كنت متونس ومرتاح وقاعد
وقررت لازم ابوح ***** بحبي الها وما احايد
بوري مابوري اسولف ***** يعني قابل مصارح مجاهد
أجيت وتقربت يمها ***** جسمي يرجف وحيلي بايد
والضغط عندي تخربط ***** مرة نازل ومرة صاعد
قمت أتمتم وصرت أعتعت ***** وصرت أحس بلساني جامد
مثل سيارة عتيقة ***** وانكسر عدها قايد
ردت افلت منها ما عاد ينفع ***** قالت تفضل شرايـــــــد
قلت الها عفوأ من بعد اذنك ***** ممكن عندك قلم زايــــــد