كشفت الإعلامية دعاء فاروق عن تعرض خادمتها للعنف المنزلي من جانب زوجها الذي دائما ما يعتدي عليها بالضرب مما أسفر عن إصابتها بغيبوبة سكر .
وأكدت دعاء فاروق في منشور لها عبر حسابها على موقع التواصل الاجتماعي فيس بوك على أنها سوف تتقدم ببلاغ ضد هذا الشخص ولن تتنازل عن حق خادمتها، بالإضافة إلى تقدمها ببلاغ آخر يفيد بعدم تعرضه لها .
فكتبت: “لحد امتي الستات هتفضل تتهان وتتمرمط ومحدش يعرف يجيب لها حقها .. رباب الست المحترمة اللي بتشتغل عندى بقالها ١٣ سنة ربتلي عيالي وصانت أكل عيشها معايا وحافظت علي بيتي بمنتهي الأمانة” .
تابعت: “أشهدلها بالنضافة والأمانة والأدب والإخلاص والأخلاق، شقيانة طول عمرها عشان تربي بنتها وابنها أحسن تربية ومتجوزة بلطجي شمام بيضرب حشيش بفلوس شقاها وشغلها عندي” .
أضافت: “أنا هنزل اعمل فيه بلاغ حالا لأنه بيهددها بأنه يرمي في وشها ماية نار .. الضلالي اللي سرق عفشها كله ونقله علي بيت أمه وسرق جهاز بنتها العروسة اللي غصب عني مضطرة أقول إن أنا اللي بجهزها من عندى من المعارض” .
واصلت “فاروق”: “سرق كل ده وطردهم من شقتهم اللي أنا أسفة إني مضطرة أقول إني بدفعلها إيجارها وتأمينها، وبيهدد الست صاحبة البيت إنه عاوز التأمين وإلا هيفك موتور الماية وهياخده بلطجة كده” .
قالت: “الست بتجيلي يوماتي جسمها أزرق من كتر الضرب اللي في جسمها وبيكتم بقها وبيعذبها حرفيا، بياخد فلوسها يشرب بيها حشيش ويضربها ياما قولتلها اطلقي وامشي، اطلقي وسيبيله كل حاجة وامشي” .
أكملت: “تقولي أخاف ياخد مني عيالي، دلوقتي رباب في غيبوبة سكر وعيالها كلموني بيستنجدوا بيا ومنهارين علي أمهم الشقيانة ومش طايقين أبوهم اللي راح يسحب ورق الولد من المدرسة مش عاوزه يتعلم وبيهددهم إنه هيحرق قلبهم علي أمهم” .
واستطردت دعاء فاروق: ” طيب يا راجل يا ضلالي ياللي سرقت عفش وجهاز بنتك اللي مراتك جايباه من شقاها، أنا هعمل بلاغ رسمي للجهات الرسمية فيك وهنزل حالا أجيب حق رباب بالقانون قبل ما تتقتل فطيس، هلحق الجريمة قبل ما تحصل” .
واختتمت: “وبالمرة هروح أعمل محضر عدم تعرض لأنه أكتر من مرة يهددها إنه هيضايقني .. طيب يا بلطجي عصرك وأوانك أنا ببعت استغاثة للجهات الأمنية عشان أنقذ الست الغلبانة وعيالك الغلابة اللي بيكلموني مفطورين من العياط من بطشك وظلمك وقلة أدبك” .
