أحمد الكاشف… vip

السلام علكم ورحمة الله وبركاتة …
إخوتى وأخواتى ،،،
كيف حالكم ؟ إتمنى أن تكونوا بخير
موضوعى النهاردة هحكى فيه إزاى عرفت نورت ؟ ومين أول الأعضاء إللى عرفتهم وقابلتهم على نورت ؟ وإيه إللى شدّنى للبقاء على صفحات نورت ؟
فى البداية أحب أقدم لكم نفسى
إسمى : أحمد الكاشف
عُمرى : 28 عام
جنسيتى : مصرى
وظيفتى : Senior Auditor
إسمى المُستعار على صفحات نورت : VIP

إزاى عرفت نورت ؟
كانت عن طريق ( الصُدفة ) ، كنت قاعد فى أوضتى فى يوم من أيام شهر ديسمبر 2008 وكانت الساعة تقريباً 2:00 صباحاً ، ما كانش فى حاجة مُعينة ورايا أعملها ، فلقيت نفسى دخلت على موقع ( جوجل ) وكتبت فى مُحرك البحث ” عمرو دياب ” وليه كتبت عمرو دياب بالذات ! يمكن علشان بحب الراجل ده ، يمكن علشان بحب أغانيه ، حاجة من الحاجات دى كان سبب لكده .
المُهم لقيت ملايين النتائج قُدامى ففضلت أقلب فى بعضهم وإختارت العناوين إللى شدّتنى منهم ، فكان موقع ” جريدة نورت ” واحد ضمن المواقع اللى وقع عليها إختيارى
وشدّنى عنوان موضوعها ودخلت أقراه .

مين أول الأعضاء إللى عرفتهم وقابلتهم على نورت ؟
بعد ما قريت الموضوع الخاص بعمرو دياب فضغط على الصفحة الرئيسية علشان أعرف ( أنا فين ) ؟ فلقيت الإنترفيس ( الواجهة ) الرئيسية بتاعة جريدة نورت ،
وإبتديت أقلب فيها ، علشان أعرف إللى أنا فيه ده إيه ؟ مُنتدى ولا موقع ؟ ولو موقع هيبقى شامل ولا خاص بالفن فقط ؟ وهكذا …….
إول أعضاء قابلتهم على الجريدة حسب الترتيب :
Top Quality
Susanne
Dentist
Nursay
NurALLAH
Yasser
Cruse
Dodo
Dana
ننوسة
فواز
نهلة
نزف الحنين
وإبتدى يظهر أصدقاء آخرين فى الفترة الأولى لى على الجريدة مثل فريد قرقناوى ، نور ( السورية ) ، مها الرفاعى ، ندى ( تودى – رند ) ، إخيليس ، مايا أميريكا ، د/ رانيا ، محمد سامى ، نيللو ……. وغيرهم من الأصدقاء ، والأصدقاء دى منهم إللى إحتكيت معاه ومنهم إللى إختلفت معاه فى وجهات النظر، لكن أهم حاجة عاوز أقولها إنى بكنّ كل الإحترام لأى صديق إحكيت معاه وعرفته على الجريدة سواء كان إحتكاك إيجابى أو سلبى ، وأعذرونى أنا مش هتطرق بالكلام عن الأصدقاء إللى ذكرتهم لإنى لو إتكلمت عن أى واحد منهم الكلام هيطيل وهيحتاج أكتر من موضوع علشان أوفيه حقه .

إيه إللى شدّنى للبقاء على صفحات نورت ؟
هاها 🙂 عاوزين الحق أول حاجة شدّتنى للبقاء فى الجريدة ، إنى لما كتبت تعليق على أول موضوع أقراه على الجريدة وإللى كان فى أول يوم ليّا إتنشر فى التو واللحظة ، لأنى كنت بتخنق أوى من الجُملة دى على المواقع الأخرى : ( تم إرسال تعليقك بنجاح ، سيتم المراجعه ثم النشر ) ! ولو مكانش إتنشر فى لحظتها ماعتقدش إنى كنت هتابع تانى أو هراقب التعليق ، وبالتالى ماكنتش هتيجى الفُرصة إللى هتخلينى موجود على نورت ومتابع ليها ، طبعاً ده غير سبب معرفتى بيكم كـ أصدقاء تشرفت بمعرفتها .

ملحوظة :
الأصدقاء المذكور أسمائهم فى الموضوع ، يعتبروا الأصدقاء القُدامى ( أصدقاء الفترة الأولى لى على الجريدة ) ، مازال منهم المُتواجد فى الجريدة حتى الآن ومنهم من غاب عنا ونتمنى رجوعه مرة أخرى ، لكن طوال فترة وجودى على الجريدة معكم أعتبر كل عضو جديد على الجريدة صديق لى حتى دون إحتكاك بيننا .

كان فى بعض الأصدقاء حابة تشوفنى وتعرفنى ، وعلشان أنا كمان حابب أشوفهم وأعرفهم فهخليهُم يشفونى بس مش فى صورة ! إنما فى ( نُص صورة ) لإن نشر الصور مش أساس موضوعى النهاردة .
تحياتى للجميع …