إن شاء الله خير

مرسلة من vip

السلام عليكم ورحمة الله وبركاته ،
كيف الحال ؟ يارب تكونوا بخير …
تعالوا نسمع الأغنية بعدين نكمل كلامنا

سمعتوها ؟ … طب إيه رأيُكم ؟ … مكسوفين صح ؟ كل كلمة قالها فى الأغنية صح 100 % بل النسبة تعدى الـ 100 % كمان ! مع إنى شايف إنه كان حنين شوية فى التعبير عن إللى بيحصل بين الشعوب العربية لأن إللى بيحصل فى الواقع أكتر بكتير من إللى صورته كلمات الأغنية !
تعالو نتكلم على نورت مثلاُ كـ جريدة بتضُم مُعجبين من مُختلف البُلدان العربية ، لما تُنشر موضوع عن بلدٍ ما إيه إللى بيحصل ؟
بنلاقى ” مُعظم ” مش هقول ” جميع ” مُعلقين الدول الأخرى نازلين هرس و عجن فى البلد و ردح لشعبها و هاتك يا تقطيع فرو ! و إللى يقوله ياللى بلدك ما عرفش إيه ، و التانى يرُد عليه أسكت ياللى بلدك مشهورة بـ إيه ! لحد مالكلام يطول بنات البلد و شرفهم ويفضلوا يطعنوا فى شرف بنات بلدهم !
مش عارف ليه إحنا كده يا جماعة !
خلافات فى الدين …….. ياما إختلفنا ما بين مُسلمين و مسيحيين ، سُنّة وشيعة !
خلافات فى الجنسيات …. ياما قطّعنا بعض !
خلافات فى الإهتمامات …. ياما بهدلنا بعض ! أصل فولان بيشجع الريال و علّان بيشجع البارشا يبقى إزاى نحترم وجهة نظر بعض من غير ما نقطّع بعض علشان نعبّرعن حُبنا للفريق المُفضل لدينا ، و قيس على كده الإهتمامات بالفناننين وبالفنانات و هكذا !
ليه دايماً بنهاجم بعض ؟ ليه دايماً ما بنحترمش وجهة نظر بعض ؟ ليه ديماً رأى المُستمع هو إللى صح ، علشان رأى المُتكلم مُخالف لرأيه ؟!
ما أفتكرش فى مرة إنى قريت كومّنت لـ أوروبى بيشتم فيه أوروبى ، و بيقوله أصل إنت ألمانى و أنا فرنساوى ! أسكت ياللى بنات بلدك بييجوا عندنا وبيحصلهم إللى بيحصلهم ، والتانى يرد عليه ويقوله أسكت ياللى بلدك بتستورد من عندنا كذا وكذا وكذا يا فقير ياإبن الشحات !
بجد يا جماعة فى حد منكم صادفه إللى أنا بحكيه ده ما بين الأوروبيين و بعضهم ؟!
دخلت من فترة وقريت التعليقات الخاصة بالقضية المصرية السعودية الأخيرة ! و إشمئزيت من التعليقات ، ناهيك عن القضايا الاخرى إللى بين الدول و بعضها غللى الشعوب بتاكل فيها بعض على الإنترنت ! ، هو مش إحنا العرب إللى بيجمعنا ( دين ) و ( لغة ) و ( دم ) و ( لون ) ! إزاى كده مع بعضنا !
.
هـ أحكيلكم على حكاية حصلتلى و أنا فى أولى ثانوى ، كان عندى حصة عربى و المُدرس كان غايب فى اليوم ده فـ بعتولنا أستاذ ( إحتياطى ) ، المُهم لقيت صاحبى إللى جانبى فى الدكة ” الله يمسيه بالخير ” طلّع ورقة وقلم رُصاص و فضل يرسم المهم بعد ما خلص بصيت على إللى رسمه لقيته راسم أعلام الدول العربية كلها على شكل مُربع فى شمال الصفحة ، و علم إسرائيل على يمين الصفحة ، وطالع دراع إنسان من المربع إللى بيشكل أعلام الدول العربية و ماسك عود كبريت موّلع وبيحرق علم إسرائيل و مكتوب فى أعلى الصفحة ( الحلم العربى ) ، قُمت إبتسمت كده بسُخرية وقولتله ( الـ حلم ) !! خلاص خلتوه حلم ! قالى آه حلم ، قولتله ليه يعنى للدرجادى ! يا إبنى إسرائيل دى ( تدّك ) فوق دماغها من أقل دولة عربية فى الوطن العربى ، الموضوع مش محتاج حلم !! وكُنت ساعتها خد عندك بقى أبييييييييييييييض خالص فى السياسة و كبيرى أعرف أن علم مصر لونه احمر و أبيض و أسود و فى نسر فى النُص ، ولا حتى كنت أعرف أن فلسطين مُحتلة !
لكن لما عرفت و دوّرت و إحتكيت … فهمت معنى ( الحلم ) إللى صاحبى كان يقصده ، عرفت إنه فعلاً حلم ! بس أنا لسه عن رأيى و مستهيف إسرائيل و بقوللكم تعالوا بقى نخليه حقيقة و ما نفقدش الثقة فى بعض !
مع بداية معرفتى بالإنترنت و أنا كل إهتماماتى وتطلعاتى إنى أحتك بالمُنتديات إللى فيها عرب أو جنسيات مُختلفة ، لحد ما عرفت نورت بالصُدفة فى 2008 ، و من الأسباب الرئيسية إللى خلتنى أستمر مع نورت إنها بتضُم جنسيات مُختلفة زى ما كُنت بتطلّع .
كان هدفى من كده هو إنى أعرف الناس دى بتفكر إزاى ، الناس دى بتسمع لبعض إزاى ، الناس دى شايفانا إزاى و شايفين بعضهم إزاى ؟ يعنى مُمكن أختصر كلامى فكونى كنت بدوّر عن ” تبادل الثقافات ” ، لكن للأسف كُل إللى لقيته من ساعة ما عرفت الإنترنت لحد هذه اللحظة ما هو إلا حقد وشر و كُره بنحمله لبعضنا البعض !
أنا مش عاوز تكون رسالة الموضوع ده الهدف منها النقد ، لأ بالعكس أنا عاوز يكون الهدف منها الإتحاد .
يالا إبدأ من دلوقتى حالاً ، مش عاوزك تُخرج من الصفحة دى غير و إنت ناوى إنك تكظم غيظك، إنك تقابل الرأى الأخر بصدر رحب ، إنك تبدأ كلامك بالحُب و الود مع غيرك ، تحب غيرك ، تسمع لغيرك ، تحترم رأى غيرك ، تلتمس العزر لغيرك ، تستحمل غيرك .
صدقنى ده مش صعب ، إنت ليه مستصعبه ، طب جرّب كده وكل إللى عليك إنك تبقى راجل بينك وبين نفسك بعد كده راجل بينك وبين غيرك ، راجل فى مواقفك وفى كلامك و كفاية بقى نضحّك الأعداء علينا !
.
.
و إن شاء الله خير ..