الباشا الكلب

صحيت مرة من النوم و فكرة أني اشتري كلب مسيطرة علي دماغي. أهو يقعد معايا و يسليني بدل مانا لوحدي. بس كنت عايز كلب يكون كبير في السن شوية علشان مايقرفنيش في الجري و التنطيط كل يوم
سألت حبايبنا هنا فنصحوني اروح مستشفي الكلاب اللي جنبي علشان بيكون عندهم كلاب للتبني و أسعارهم معقولة

وصلت مستشفي الحيوانات و ركنت العربية

مبدئياً المستشفي من بره انضف من انضف مستشفي بني أدمين شفتها في حياتي. تصميم انيق عصري. نفسي غمّت عليا لما قارنتها بالمستشفي اللي دخلتها في بلدنا زمان لما جالي إمساك مزمن، يومها دخل عليا اتنين ممرضات لا يقللو عن ١٥٠ كيلو كل واحدة منهم علشان يدوني حقنة !! التجربة كانت قاسية عليا جداً لدرجة ان لسة بيجيلي كوابيس منها لحد دلوقتي.يللا هيروحوا من ربنا فين

المهم وصلت الرسيبشن و قلت للست اللي قاعدة أنا عايز اشتري كلب

باصّتلي بنظرة فيها تعجب ممزوج بالقرف و قالتلي احنا مابنبعش كلاب هنا، انت ممكن تتبني كلب او قطة

بلعت ريقي بصعوبة و حسّيت ببعض قطرات من العرق تتسابق علي جبهتي

قلتلها و ماله، بس هما فين؟

شاورتلي بأيديها أني انزل تحت

نزلت تحت و لقيت ريسبشن تاني و عليه يافطة بتقول “مركز تبنّي الحيوانات اليتيمة”. بدأت اشعر بحاله من عدم الارتياح و كنت عايز اطلع اجري. أنا كنت فاكر الموضوع ابسط من كدة…المهم وصلت الرسيبشن التاني وقابلتني مزّة من النوع الفاخر اللي بيطلع في المجلات ده و علي وجهها ابتسامة ماركة جوليا روبرتس

بصراحة قلبي انشرح و تفاءلت خير

أنا : مساء الخير، أنا عايز كلب

المزّة: اوي اوي. اتفضل ورا اتفرّج علي اللي موجودين و ارجعلي تاني لو واحد عجبك. يا سلاااام…ماهو الموضوع بسيط اوي أهو

لفيت علي الكلاب اللي كانت موجودة واحد واحد لحت ماعجبني واحد فيهم و رجعتلها

أنا : الكلب اللي اسمه باشا عجبني

المزّة: هايل، ده كلب ممتاز. تحب تتعرف عليه و تقضي معاه وقت علي انفراد؟

أنا : أفندم؟؟

المزّة: احنا لازم نطمئن ان الكلب هيستريحلك

أنا: …………

المزّة : أنا هاجيبهولك وانت تخرج به في الجنينة شوية علشان تعرفه على نفسك أولا وبعدين تتعرفوا علي شخصيات بعض

معرفش ليه حسّيت أني جاي اتجوز مش اجيب كلب. بس قلت يا واد ماعلينا خليك وراهم. جابتلي الكلب و اخدته في الجنينة. الصراحة كان لطيف و حبوب و دمه خفيف. بس طبعاً مقدرتش اعرف اذا كان هو بيبادلني نفس الشعور ام لا!! رجعت للمزّة و قلتلها بإستظراف ان الكلب عاجبني، ممكن تسأليه أنا عجبته ولا لأ؟ ضحكت ضحكه صفرا و دخلتني غرفة فيها ترابيزة اجتماعات و قالتلي المسؤول عن الكلب هيجيلك يعمللك انترفيو

انا: ……………!!!

دخل عليا راجل محترم كدة طول بعرض و شكلة سفير، وكيل وزارة، جيمس بوند….حاجه تفرح!! بعد السلامات طلّع رزمة ورق المفروض أملاها. بيانات عن حالتي الاجتماعية، مستوايا التعليمي، بتكلم لغات اجنبية ولا لا، دخلي الشهرى، نوع السكن، الوقت اللي متوقع اقضيه مع الكلب، اي خبرة سابقة في التعامل مع او تدريب الكلاب، ما هي خططي المستقبلية فيما يتعلق بالكلب وأخيراً لو انا مت او جرالي حاجة مين هياخد باله من الكلب

في هذه اللحظات الحاسمة و الدقيقة من حياتي، كنت علي وشك أقوم اقلعلهم ملط و ادغدغ المكان علي دماغهم!! هو انا باشتري كلب وللا هاتجوز؟ ده انا لما اتجوزت محدش عمل معايا كدة! ده حمايا كان ناقص يديني شهادة ضمان لخمس سنين و علبتين كبريت و كرتونة فراخ قبل ماتجوز

مسكت نفسي بالعافية وقلت مش مهم، ان كان لك عند الكلب حاجة…. قل له يا باشا

جيمس بوند بص في الورق اللي انا مليتة و قاللي بنبرة صوت حزينة كلها أسف ان ظروفي الشخصية و مستواي الاجتماعي لا تسمح انهم يدوني الكلب. هو شايف أني مش حقدر أوفر رعاية تليق به و توفر له الحياة الكريمة التي يستحقها .
المهم روحت البيت وأنا بقول الحمدلله الباشا رفضني مش انا اللي رفضته.