سامعة يا “جامعة” !

كل يوم نلقى العروبة ..

راجعة لورا !

والوحدة رايحة فغيبوبة ومتدهورة !!

وإنتى يا جامعة ..

شايفة وسامعة

لكن ساكتة ..

أو مكتفية بحتة جلسة !

مهما بيكبر حجم الكارثة ..

تلقى الجامعة ..

رافضة وشاجبة !

أو مش حابة .. تزعل حد !!

بس إن جيتوا لجد الجد ..

ممكن ليها بعض العذر !

هو ميثاقها اللى مقيدها ..

وبسلبيته مكتف إيدها ..

ضد الشر

هي فى ذاتها فكرة جميلة ..

وحدة نبيلة

بس واقعها ..

واقع مر !

خلى مكانها .. بره الملعب !!

يبقى المطلب ..

عادل لينا ..

لما نطالب بالتغيير !

علشان نلقى ميثاق يحمينا

جو إيجابى وله تأثير ..

يرفع راسنا

وماتقدرش الغولة تدوسنا ..

أو تقهرنا !

تانى قمرنا ..

يسطع ضوه

تانى شيطانا ..

نكسر سوه

تبقى الجامعة ..

فعلا جامعة

ماتفرقش ..

ماتشتتش

تصبح جنة ..

فيها حياتنا بإذن الله ..

أحلى حياه ..

تمحى الآه وتسر القلب

قولوا معايا ..

قولوا يا رب

=-=-=-=-=

بقلم : محمد حلمى مصطفى

الأسكندرية – جمهورية مصر العربية

=-=-=-=-=-=-=-=-=-=-=-=-=-=