طرطشات

*زمان كانت الشبكة بسيطة ورقيقة ، فكان معناها ” بحبك يا قلبي “

إنما دلوقتي بقت مرهقة جدا وغالية فبقى معناها ” آآآه يا قلبي “

………………………….

*الناس نوعان ..

تعساء ..

وسعداء .. يجيدون إخفاء تعاستهم .

…………………………..

*كمشروع كاتب يسعى للإحتراف ويطلب الإنتشار

قررت أعمل زي أنيس منصور ..

مش هو بينزل مقالاته مع صورته ..

أنا كمان هانزل مقالاتي مع صورته .

…………………………..

*الفئة الوحيدة اللى مش هتقدر تعترض على زيادة الضرائب هما

الجماعة بتوع السجائر والمعسل والبيرة ..

لأن كل ماهيتفقوا على مكان للمليونية .. هتلاقى كل واحد راح حتة شكل .

…………………………..

*أجمل فترة فى الجواز .. هي اللى قبل الطلاق علطول .

…………………………..

* فى مصر ركبت مع سواق تاكسي وقالي : ماتعرفش تردد قناة ” أون تى فى “؟

قلت له : لأ .. بس ليه ؟

قالي وهو منشكح من الإنبساط : أصلى طلعت فى التليفزيون فى لقاء

 عن الانتخابات البرلمانية الجاية ؟

قلتله : ها ، طب وقلت ايه بقى ؟

قالي : أنا ماقولتش حاجة ، أصلي كنت معدي من وراهم وطلعت فى الصورة بس !!

…………………………..

*بشوف دايما فى الأفلام الأجنبية لما البطل يبقى مهزوم وبيواجه صعوبات ويقوم

داخل حجرة النوم أو الحمام ويقوم باصص فى المراية ويقول لنفسه :

Trust Your Self !! Yes .. Yes

You Can do it .. You can do it

وبعدها يخرج كأنه واحد تاني ، ومدغدغ الدنيا ، ومسوي الهوايل

نفسي أعرف المرايا اللى بيبصوا فيها دي ، بتتباع فين ؟