التفاؤل… سر الحياة

دونا ماريا: مشكلة هادي !!! عشرين مرة هادي تنتصل بالتيليفون ديال ازميرالدا و هي طافياه…فيكتوريا فيكتوريا آفاينك آلفنيانة؟؟
فيكتوريا: نعم آللا…عيطتي عليا…هانا آللا..
دونا ماريا: هادا عشرين اتصال نتصل بهاديك لملعوقة ديال أزميرالدا…. و البورطابل ديالها مطفي…الأرقام ديالها كلهم اتصلت بيهم …طافية كلشي…سيري لعند هاداك السيكليس ديال الويل…و سوليه عليها يمكن شافها أو يمكن تكون مشات لعندو و الا واقيلا هو اللي خطط ليها باش تهرب…يالاه سيري شنو مازال كتسناي…طلقي راسك !!!
فيكتوريا: هي الأولى آللا…هي الأولى..
دونا ماريا: فين غادية…هالباب من هنا …آويلي مخدمة معايا رباعة الحماق..
فيكتوريا: آناري هاد الشيبة العاصية دوختني حتى على البيبان ما بقيت عرفت آش من باب غادي نخرج منه…طيرتها مني خلعة …بغيت ليها الماء في الركابي..
اغناسيو: شكون؟؟ شكون اللي تيدق؟؟ آه فيكتوريا هادي..ياك لاباس؟؟
فيكتوريا: والو باس آسي اغناسيو..كاين إدواردو؟؟
إغناسيو: اييه موجود…ياك لاباس ؟؟ آش واقع؟؟
فيكتوريا: غير كلموا ليا بغيت نسقسيه على ازميرالدا..
إدواردو: أهلا فيكتوريا لاباس عليك؟؟ شنو واقع؟؟ مالها ازميرالدا؟؟
فيكتوريا: جيت نسقسيك عليها ما شفتيهاش راها جمعت حوايجها و خرجت من الدار…قلنا ياك ما جات لعندك..
إدواردو: لا…ما شفتهاش…هادا شي أسبوع ما شفتها..
فيكتوريا: وافين غادي تكون مشات؟؟
اغناسيو: تصلتوا بيها في التليفون ديالها؟
فيكتوريا: ما كتجاوبش…حيت طافية البورطابل ديالها..
اغناسيو: مشكلة هادي…فاين غادي تكون مشات؟؟
إدواردو: أنا غادي نمشي نقلب عليها..
فيكتوريا: تليفوني كيصوني واقيلا للا دونا ماريا هادي..
فيكتوريا: آلو…شكون معايا؟؟
خوانيتا: بنت أختي فيكتوريا لاباس عليك أنا خالتك خوانيتا..
فيكتوريا: خالتي خوانيتا لاباس عليك كيدايرة الصحيحة؟؟ واش خبار البهيمات ديالي؟؟ البقرة ولدت؟؟
خوانيتا: أنا لاباس آبنتي…و البقرة ولدت عجل صغير و زوين هههه شوفي آبنتي راها ازميرالدا عندي هنا في لاكاسا غراندي…ما تقلقوش عليها…و خبري جداتها بلي راها غادي تجلس عندي شي أسبوع أو جوج..
فيكتوريا: الحمد لله…خبيرات زوينة هادي…ازميرالدا عندك..و البقرة ديالي ولدت ليا عجل….و هادي خبار السعد…
إدواردو: الحمد لله…ها حنا تهنينا…
إغناسيو: الحمد لله…عاد رتاحينا من جهتها..
فيكتوريا: سمحوا ليا غادي نمشي نخبر للا دونا ماريا بالخبار..بالسلامة عليكوم..
فيكتوريا: للا دونا ماريا…ازميرالدا راها عند خالتي خوانيتا في لاكاسا غراندي…راها اتصلت بي خالتي بنفسها و خبرتني ..قالت لي غادي تبقى عندها شي أسبوع أو جوج..
دونا ماريا: واش هادي حمقة و بغات تحمقني…خطيبها ماريو دي سانتياغو كيتسنانا باش نمشيو نشريو خواتم الخطوبة و هي بغات تبقا أسبوع عند خالتك في العروبية؟؟ سيري قولي ل خوان يوجد الطوموبيل نجيبوها بالخاطر و الا بزز منها…إيووووا مزيااااااان..
فيكتوريا: آللا خليها ترتاح شوية في لاكاسا غراندي…راها خالتي خوانيتا غادي تهلا فيها و تحطها في عينيها…خليها آللا ترتاح شوية راها عيانة شوية…
دونا ماريا: سكتي ماشي نتيا اللي غادي توريني شنو غادي نعمل…و الراجل اللي كيتسنا فينا شنو نعملو معاه؟؟ الناس ماشي لعبة نلعبو بيهم…يالاه سيري بالزربة ..قولي ل خوان يوجد الطوموبيل..
كريستينا: ماما…بالسلامة أنا غادية للكلية..
سوزانا: بالسلامة آبنتي ردي بالك ل راسك..
ستيفانو: أللا كريستينا أللا كريستينا هالعار غير كليمة..قلت ليك صباح الخير ما رديتيش عليا يمكن مشغولة بالغير ما خممتيشي فيا..
كريستينا: صبحنا ع الله…
ستيفانو: للا الغزالة مالكي شكون مطيرها ليك ع الصباح..
كريستينا: شكون من غيرك…فينما ندور نلقاك في جنابي..
ستيفانو: آللا الوريدة ما تعصبيش ليا…إيلا قبلتي عليا نخليك برنسيسة ديال أمريكا اللاتينية كلها..
كريستينا: هههههههههه
ستيفانو: يخلي ليا الضحيكة…منورة بحال مولاتها..
كريستينا: آ سمع هاداك الشيبة العاصية …فرقني عليك…راني ماشي من قراناتك و ماشي من سهمك…راك قد جدي..
ستيفانو: للا الغزالة راه عندي من المال اللي يتحرق ما يتم…نص ديال أمريكا اللاتينية مكتوبة باسميتي … آمري و أنا ننفذ..
كريستينا: الأمر الذي غادي نآمرك و هو تمشي توريني عرض كتافك و تبعد مني أنا ماشي قدك؟؟
ستيفانو: نخاف تندمي..
كريستينا: ههه ما كاين علاش نندم…نتا بعدا كاع ما باينة فيك واش عندك عشاء ليلة…سير سير صلح هاداك السروال المكمش و خيط الصدفة لقميجتك …. قالك نصف أمريكا اللاتينية بسميتو ههههههههههههههههههههههههههه
ستيفانو: بكرة تندم يا جميييييييييييييييل..
روزاليندا: صباح الخير صاحبتي بارباريتا…
باربارا: صباح الخير..
روزاليندا: شنو..وجدتي ليا الخطة و الا لا؟
باربارا: فكرت في واحد الخطة جهنمية و لكن موحال واش تعجبك..
روزاليندا: اماهيا هاد الخطة؟؟ عاودي ليا…راني كنسمع..
بربارا: بصراحة ناوية نخطف مانويل منك نتي و انطونيلا …
روزاليندا: شنووووووووووو !!!!!!!!!!!!!!!!!!!
باربارا: هههههههههههه شفتي راني قلت لك ما غاديش تعجبك..
روزاليندا: واش كتهضري من نيتك و الا غير تتمازحي معايا؟؟ !!!!!!!!
باربارا: تنهضر بصاح…هادشي مافيهش تفليات..و لكن غير كوني هانية غير مؤقتا بينما ينسى أنطونيلا و يمحيها من بالو… من بعد نسلمو ليك في يديك على طبق من ذهب آصحيبتي…و نتيا هاديك ساعة وجدي ليا الشيك علاش اتفقنا…
روزاليندا: بصراحة ما فهمتش هاد الخطة ديالك..
باربارا: هههههههه ساهلة ماهلة…أنا غادي نفكر في شي حيلة جهنمية تخلي مانويل يشك بلي أنطونيلا كتعرف شي حد غيرو…من بعد نتيا ما غاداش تباني في الصورة حيث غادي يشك فيك…أنا غادي نلعب دور المنقذة ديالتو… و في نفس الوقت غادي نبقا معاه شوية ديال الوقت حتى ينسى…و من بعد نسلم ليك الأمانة ديالك…و تسلميني الشيك ديالي….مفهووووووووووووم؟؟
روزاليندا: بصراحة آصاحبتي هاد الخطة ديالك صعيبة و كتخلع بزااااف ما عندكش شي واحدة من غيرها؟؟
باربارا: هههههههههههه شحال خوااافة…أو يمكن ما تايقاش بيا…ياك ما خفتي مني نديه ليك…هههههه كي بحال والوووووووووو ههههه
روزاليندا: زعما ديريها؟؟
باربارا: نتيا غير تهلاي في الشيك و حطي فيه شي رقم كبير و أنا عند وعدي..تسلميني الشيك نسلمك العريس المغفل هههههههههههه يالاه آصحيبتي …نشوفك في المحاضرة…بااااي غادي نمشي نشرب شي حاجة…تهلاي و ما تخافي والوووو هههههههههههههه
روزاليندا: بصراحة هاد بارباريتا ما ساهلاش…خاصني نرد باااالي مزياااااان منها…و لكن الخطة عندها جهنمية واااعرة…ما عندي ما يتسالها هههه
ماريا فرناندا: آلو شكون معايا؟
أنطونيو: الواليدة أنا هدا أنطونيو ولدك..
ماريا فرناندا: ولدي انطونيو…الكبيدة ديالي …توحشتك آولدي…حرام عليك قطعتي خبارك عليا…قلبي واكلني عليك آولدي…و طار النعاس من عينيا..رااااني خاايفة عليك آولدي يشدوك..
أنطونيو: ما تخافي والو آلواليدة راني بخير و على خير..كيدايرة روزاليندا و أنطونيلا لاباس عليهوم؟؟ و الكراء خلصتوه و الا مازال؟؟ ياك ما قطعوا عليكوم الضو و الماء؟؟
ماريا فرناندا: الحمد لله آولدي كلشي لاباس…خلصنا الكراء و الماء و الضو…أنطونيلا خذات المنحة ديالتها و أنا خدمت شي تريكوات و خلصنا اللي علينا آولدي ما تقلقش من جهتنا..
أنطونيو: الوليدة إن شاء الله إيلا صوبت أوراق الإقامة و خدمت غادي نصيفط ليكوم لفلوس..
ماريا فرناندا: إن شاء الله آولدي…عافاك ولدي الله يرضي عليك…ما تبقاش تعطل عليا في التليفون…و ما تبقاش تسبق كريستينا و تنسى ميمتك..
انطونيو: شكون قال ليك هكا؟؟…أنا راني غير مشغول شوية..
ماريا فرناندا: روزاليندا قالت لي بلي نتا تتهضر مع كريستينا في الانترنت و تتنسى ميمتك آولدي..
انطونيو: هاد روزاليندا المسمومة مازال تابعاني بسمها حتى و أنا حارك ل ميامي…الله يعطيها….و الا بلاش..تهناي آلواليدة وقتما لقيت فرصة غادي نعيط ليك نتيا الأولى…بالسلامة دابا آلواليدة..
ماريا فرناندا: بالسلامة آولدي.. الله يرضي عليك…الله يفرشك بالرضا و يغطيك بالرضا و يحنن عليك قلوب الميريكان………………………………………………………..يتبع

تسلمي يامريم حلقة اليوم حلوة وطويلة لن بيها ماشاء الله بقرة وعجل جديد وانوب برنسيسة ديال أمريكا اللاتينية كلها وخطط جهنمية وخرب ابيوت وخطف العريس هههههههههههههههههههه