الرياضة الحديثة ..!!

مرسلة من صديق نورت مأمون

في أحد الفروع الامنية .. كان احد المهتمين بالرياضة يحاول الحصول على موافقة أمنية لإنشاء نادي رياضي …
الضابط : أي يا حبيب … قلتلي بدك تعمل نادي رياضي ؟
الرياضي : أي والله يا سيدي .. من بعد موافقتكم طبعاً .
الضابط : أي ليش لا .. بتعرف دولتنا تشجع الرياضة والرياضيين ..بس ما قلتلي شو رح تسميه ؟
الرياضي : رح سميه … نادي الحريّة ..!
الضابط : حريي ؟!! .. بدك حريي ؟!!!! .. قصدي بدك تسميه حريي ؟!!! يعني تركت كل الأسماء ولحقتلي هالأسم ؟؟!! حبكت يعني .. أصلاً هو أسم كلاسيكي ودقة قديمة .. لاقي غيره يلا ..
الرياضي : طيب سيدي والله معكم حق .. رح سميه .. أممم … نادي الثورة .
الضابط : لك ثور اللي ينطحك .. لعمى بعيونك لعمى .. لك شو أنت مندس شي ؟؟!!
الرياضي : أعوذ بالله يا سيدي .. شو مندس ما مندس .. خلاص بلاه هالاسم كلو .. خلص سيدنا أنت اختار الأسم على كيفك .. أنتوا أدرى بالاسماء سيدي ..
الضابط : أمممم .. طيب انا رح اخترلك الأسم .. رح نسميه ” نادي الحوار الوطني ” .. اسم عصري ويلبي طموحات المرحلة .. ولا شو رأيك ؟!
الرياضي : معكم حق سيدي معكم حق .. الله يخليلنا ياكن .. يعني لو بعيش مية سنة ما بلاقي اسم مناسب للمرحلة متل هالأسم ..
الضابط : طيب .. هي خلصنا من الأسم .. هات لشوف .. شو اهدافه ؟
الرياضي : عفواً سيدي ؟؟؟؟
الضابط : لك شو اهدافه ؟
الرياضي : مينو هاد سيدي ؟
الضابط : لك البطيخ .. النادي الرياضي ..!!
الرياضي ( محتاراً ) : يعني والله ما بعرف ياسيدي شو بدي قلك .. شو رح تكون اهداف نادي رياضي .. يلعب ويفوز وياخد بطولات .. هي اهدافه سيدي .
الضابط : قلتلي يلعب !! ( يضرب بيده على الطاولة ) .. لك هلق وقت لعب هلق ؟؟
الرياضي ( متلعثماً ) : معك حق يا سيدي ،، بس يعني .. يعني .
الضابط : أي أي خلصنا .. احكيلي لشوف .. قديش أعضاء النادي ؟!
الرياضي : يعني مع لاعبين واحتياط وفنيين بيطلعوا حوالي 25 واحد
الضابط : شووووو ؟؟ 25 !!! ..لك أنت ما بتعرف أن التجمعات ممنوعة ؟؟ نقصلي العدد نقصه ..
الرياضي : طيب سيدي .. يمكن نستغني عن شوية لاعبين احتياط .. يعني يصير العدد 15 .
الضابط : لأ .. كتير .. هدول بيعملوا مظاهرة .. خلص رح حط العدد 5 .
الرياضي : معقول يعني سيدي ؟! نادي رياضي خمس لاعبين ؟؟!! ..كيف بدو يفوز هيك نادي ؟
الضابط : لك أجدب أنت ؟! .. كل النوادي رح يكونوا خمس لاعبين كمان ، مو بس ناديك .
الرياضي : طيب سيدي .. واذا لعبنا مباريات مع نوادي خارجية ؟!!
الضابط : أيوااااا .. وقعت بشر أعمالك ..قول انو ناديك ألو ارتباطات خارجية !!
الرياضي : لالالالا سيدي معاذ الله .. قصدي يعني اذا مثلنا الوطن بالمحافل الدولية .أكيد رح نخسر .
الضابط : أييييييي دخيلك .. ما طول عمرنا عم نخسر .. اذا بيكونوا اللاعبين 100 لاعب رح نخسر .. خلص انتهينا .
الرياضي : طيب سيدي متل ما بدكم .. ياريت تشرفونا سيدي على الملعب وتحضروا اول مباراة نلعبها ..
الضابط: هاهاهاها .. لأ فالح والله .. بدك الفريقين يتلاقوا بملعب واحد ويلعبوا ؟!!
مو ناقص غير يحضروا الجماهير كمان ؟؟!!
الرياضي : عفواً سيدي .. بس يعني كيف رح يلعبوا الفريقين ؟؟!
الضابط : نظراً لضرورات المرحلة ولحساسية الاوضاع التي تمر بها البلد .. فقد تقرر أنو الفريقين يلعبوا بالتناوب .. كل فريق يلعب شوط .. والمدعوم أكثر .. قصدي اللي يدخل أهداف اكثر يفوز .. هاي الرياضة الحديثة .. لان متل ما بتعرف انو احنا رح نصير نموذج يحتذى للعالم بكل شي …!!!!

ولكم مني كل الود والورد ….