الليدى لواحظ وعبد المتجلى ‎(الحلقة الثانية)‎

مرسلة من صديقة نورت فاتي

من يوم ما الست ام لواحظ عرفت بمعاد الخطوبة والبيت بقى فى حالة طوارىء خبط ورزع وتنفيض ويوم الخميس البيت بقى ولا بيت المحافظ وجاهز لاستقبال الفارس الهمام عبد المتجلى .
اوضة لواحظ…….لوووووووووووى لووووووووى وبنات العيلة بيغنوا ماتزوقينى ياماما قوام ياماما ده عبد متجلى بره وجايب الشكمان ياماما.
(لواحظ بتقول فى نفسها: اوووووووف عيال رخمة ربنا ياخدهم ) وعشرة واقفين يزوقوا فيها وهى ضربة الوش الخشب ومش طايقة دبان وشها.
فى نفس الوقت كان عبد المتجلى والست والدته طالعين على السلم وماسك ايد والدته الست بهية.
الست بهية: بشويش يا بنى مفاصلى بتنقح عليا.
عبد المتجلى: يلا بقى يا أما عاوز اشوف لواحظ.
كان الاستاذ برعى جار والد لواحظ نازل بالصدفة وبص لعبد المتجلى بحسرة وقاله: “إنا لله وإنا إليه راجعون مبروك يا عريس ربنا يتولاك برحمته يا بنى”.
الست بهية وشوشت عبده وقالتله: سيبك منه ده شكله مجنون الراجل ده شوف شعره منكوش ازاى ومتعور.
عبد المتجلى: الراجل ده خضنى هو يقصد ايه؟
الست بهية: كل خير يا ضنايا ماتخفش.
عبد المتجلى ظبط القميص ورفع البنطلون ومسك علبة الجاتوه اللوكس اللي جايبها معاه وضرب جرس الباب (غلطة عمرك يا عبده).
الست بهية تبصله وتضحك: اسم الله عليك يا حبيبى شبه المرحوم أبوك الخالق الناطق فينك يا شلبى تشوف ابنك وهو بيخطب.
(الام تفتح الباب وفرحانة على الاخر): اهلا اهلا اتفضلوا.
الاب: اهلا وسهلا اتفضلوا (ويسلم على عبده ويدخلهم الصالون).
الام دخلت عند لواحظ الاوضة، وقالت: يلا يا حبيبتى عريسك وصل هاتى العصير وتعالى بشويش وافردى بوزك شوية.
لواحظ: ألهى كان وقع من على السلم هو وأمه وجالهم ارتجاج وريحونا بقى.
الام: عيب يا بت ده الواد فلقة قمر يا خيبة وطول بعرض وشنبه يقف عليه الصقر.
لواحظ : صقر لما يخرم نفوخه وكمان بشنب يادى القرف عاملى فيها الملك فاروق.
الام: يلا بطلى طولة لسان وشهلى اخرجى بدل ما ابوكى يتنقط منك كفاية اللى طفشتيهم قبل كده بعاميلك السودا.
(ام لواحظ تسبقها على الصالون وترحب بالضيوف )
الام: اهلا اهلا منورة يا ست بهية.
ست بهية: بنورك يا ام لواحظ.
(عبد المتجلى مكسوف وعامل عريس ووشه جايب الوان الطيف)
الاب فى سره: (هو الواد ده اخرس ولا ايه)، وقام رزعه بأيده على كتفه منور يا اسطي عبده.
عبد المتجلى: الله يخليك يا عمى.
الاب يهمس لنفسه (الواد مؤدب واخلاق والله خسارة فى المدفع الرشاش اللى هيهل علينا دلوقتى).
ست بهية: أمال فين ست العرايس؟
الام: جاية حالا يا حبيبتى، يا لواحظ تعالى سلمى على الضيوف.
(تدخل لواحظ وماسكة صينية العصير وعاملة فيها نسمة، وسى عبد المتجلى رافع نص عينه وبيبص على فتاة احلامه اللى هتقلبهاله كوابيس باذن الله)
لواحظ: سلام عليكم، وقعدت من غير ما تقدم العصير. وامها قاعدة تبصلها عشان تتحرك وتقدمه ولا حياة لمن تنادى.
الست يا عينى قامت وقدمته ودارت الموقف بس كان هاين عليها تقعد على لواحظ تبططها من كتر غيظها وهى موصياها تقدم لحماتها الأول وبعدين العريس.
الاب: سلمى على خالتك أم عبد المتجلي يا لوزة.
لواحظ: (الهى يسلم عليها قطر هى والمحروس ابنها واخلص منهم)، أزيك يا طنط وبتضحك ضحكة صفرا طبعا.
ست بهية: الله يسلمك يا مرات ابنى يا غالية، ايه رأيك فى عروستك يا عبودى؟
عبد المتجلى: ماصدق طبعا وبص للواحظ وهى مودية وشها الناحية التانية ومش طيقة تبصله وقال: ماشاء الله يا امى.
لواحظ: الله ياخدك انتا وامك يا شيخ (الكلام ده بتقوله فى سرها طبعاً).
ست بهية: ها يا حج متولى طلباتك انتو تأمروا؟
الاب: الأمر لله يا ست بهية إحنا بنشترى راجل.
(الاستاذ متولى والست بهية وعبد المتجلى مركزين فى تفاصيل الجواز،ولواحظ قاعدة مخنوقة وحالفة تطفشهم).
لواحظ بصت لعبد المتجلى لاول مرة من اول القاعدة (ايه ده يخرب بيت سنينك ده طلع قمر )
ونزلت عينها وبعد تفكير عميق قررت تدى عبد المتجلى فرصة أما لاقته امور كده.
الاب: ها يا لواحظ ايه رأيك يابنتى نقرا الفتحة(وهو حاطط ايده على قلبه خايف تعمل اى مصيبة زى عوايدها)
لواحظ: اللى تشوفه يا بابا (يلا مع ان شنبه بيفكرنى بهولاكو زعيم التتار).
ست بهية: مبروك يا ولاد وقروا الفاتحة.
(لوووووووووى لوووووووووى) وام عبد المتجلى قعدت تعيط.
ست بهية: اهىءاهىءاهىءاهىء فينك يا ابو عبده تفرح معانا.
لواحظ: (الولية النكد دى مش هتنفع معايا) اجيبلها سى السيد بتاعها ده منين دلوقتى!
عبد المتجلى: روقى بقى يا حجة زمانه حاسس بينا دلوقتى.
لواحظ: (زمانه مرتاح من امك النكدية دى والله).
(معلش يا جماعة اصل لواحظ مش نكدية خااااااااااااااااالص وهتشوفوا بعدين )
الاب: يلا بقى يا جماعة الغدا جاهز وخلونا نفرح بقى بخطوبة الولاد.
(وبعد الغدا مشى عبد المتجلى ووالدته وهو فى منتهى الانشكاح ما هو مش عارف اللى هيجراله ولو عرف هيتمنى يروح هو لابوه شلبى بتاع المراجيح)