ماريدك بعد لو انته روحي تصير..

اعتقد هذه القصيده لما تكتب باللهجه الفصيحه تفقد بريقها..جمالها بكلماتها العاميه.

و احنا ايظاً نشتاقلك يا غالي.. بس لا تتركنا، او حتى فعلت، لا ترجع و انت اعزب!!؟
اتزوج و حتى نخلص من احزانك، العشق الممنوع هههه
وشكراً على الشعر الجميل و مني الك بعض الابوذيات…

بنيت ولانفع رصفك ولابناك
ولا خو اليشرك بهمك ولا بناك
اذا انت الشرب مايك ولا بناك
انكرك انه الذبحني بغير سية

وحـق الآل والعـترة والأصحاب
دليلي ما عشق غيرك ولصحاب
بـــعد ما امّــنْ بناسي ولصحاب
ولا أهوى بشر مـــا حن علية

وحــــق التين والزيتون والياس
وحق سن العقل والطيش والياس
إذا مـــريّت اطش جكليت والياس
اشتلة بالدرب يــاخذ تـــحية

ابد ما طاعن ابظهرك ولا نام
علي رب العرش يشهد ولانام
صرت لا ليل اهجع بي ولا نام
ولا أكدر اكول اشصار بية

يبـابك بعد مـا دكة ولا فـوت
ولا من دربك اتعدة ولا فوت
ولا متراقترب منك ولا فـوت
ولا اريدك بعد تسأل علية

عليهم الدمع يا عين كبي
وعلى غاسي الماي يا حلوي كبي
صوجي أنا بالليل أتعشيتو كبي
ما نمت ليلي وهاج قولوني علي

أتعارك ياحلو لأجلك واطك طك
وللحساد اذب حرمل وأطك طك
افرح من تراسلني وأطك طك
وأطك أصبع بس تسأل عليه

طحت بلضيج ماينفع ولاصاح
وابد مافزع الوادم ولاصاح
امتحنتك بلصحبة لاجنك ولاصح
وغدت ورقت صداقتنة ردية

شكثر مغرور أنة بحبهة وأناني
وزغير إعلة العشگ توني وأنا ني
يسألوني التحب شسمة وناني
أسمهة المنطبع إبكل خلية

وحــــــــــق غار التعبد بي نبينة
تشب جمرة عشـــقكم بــينة بينة
دوالي من عشـــقكم بـــينة بينة
ضغط سكر صفت جلطات بية

ترف لو بس تمر ليلة وشم بيك
لخلي عالوجن صدق وشم بيك
يريح صباي كون ترد وشم بيك
لخبرك شنهو مرّ بعدك علية

بنيت اوما نفع صفي وردماي
سكيتة من لبن روحي ورد ماي
انة المنحور يا وسفة ورد ماي
تصب عالكاع جن مالي ثنية

على ذاك الأخذ روحي يردهة
همت والروح بس اللة يردهة
صرت جلمة ابحلك حاقد يردهة
يصيح وفزز الشمات بية

بونيني الصخرياصاحب بجيتة
ودمعي عليك جزر ومد بجيتة
شجاك ورمحك البيدك بجيتة
وزركتة بل العضوالجتال بية

اجر جمدوب من دنياي سافات
وسف حصران هم بالكلب سافات
بجفاك انهدم من الحيل سافات
انحنه ظهري وجفاكم عم علية

الليـالي چتفن الدلال والون
وزمـاني شوفاني الاه والون
عرفتك كلت اشوف افراح والوان
عاشــرتك زدت ضيم العليه

عيوني لا دمع بيهة ولا نور
وبعدك لا شمس تنفع ولا نور
مهند ما عشك مثلي ولا نور
ولا يحيى حمل مثلي اذيه