وصفة رأي منزلية عالطريقة السورية

مرسلة من صديقة نورت سلام

انوفي عالم لسا مو عرفانين وين يصفو و شو يشوفو و انو موقف يتبنو…و حجتهون انو ما عم نشوف اعلام يقدرو يصدقو…كلو كذاب..انو كلو كلو كلو كلو كذاب…و بعدين بيقولو استدراكا.. حتى الدنيا و السورية…منشان هيك انو قررو يدفنو راسهون بالتراب متل النعامة متذرعين بالجهل و عدم وجود وسيلة اعلامية بالعالم كلو بيقدرو يثقو فيها لانو الاعلام لعبة خبيثة و اكبر مننا كلياتنا……فوين الاعلام لنعرف شو صاير؟

هلأ اول الشي اذا لهلأ مالك عرفان شو صاير ما بعرف شو بدي قلك…بيخطر ع بالي عدة كلمات بس ما رح اذكرهون حاليا…لاحقا ربما…اول الشي لحتى تعرف الجواب بدك تفهم شو السؤال… انت شو المعلومة يلي بدك تعرفها من الاعلام؟ هل ناطر الاعلام يحللك و لا يخبرك؟ يعني انت بالاول بدك تميز بين الخبر و بين التحليل…..الخبر هو مثلا مقتل سبع اشخاص….بينما التحليل بيقلك ليش و مين بيتوقعو القاتل وشو بيتوقعو كان بياكل و ليش بيعمل هيك….هلأ لسهلك طريقك شوي…اول شي اول ما بتشوف على اي محطة عميلة و او صديقة شخص و محطوط تحت اسمو محلل او باحث سياسي في دمشق…المفروض تطفي التلفزين…بالذات بمرحلة الضياع الاعلامي يلي انت مارر فيها..هدول ببساطة متحدثين غير رسميين بأسم الحكومة..منشان الحكومة ما تنمسك من لسانها…تخيل طالع وزير الاعلام و عم يقول انو فيديو قرية البيضا مأخوذ بالعراق و هدول بشمركة و اميركان…و بعد يومين يطلع الخبر صحيح…فتفاديا لوجع راس..بيزتو كم زلمة بيحكو بلسانهون بدون ما يقولو هالشي بصراحة بس انو شغلتهون محلل او ناقد او مفكر او مدرس…و البانش لاين هو “من دمشق”…و لا تخاف هون الشغلة مافيها انو والله لازم اسمع الرأي الاخر…انت بحالتك لسا بكير عليك الرأي الاخر…بالاول لازم يكون عندك رأي خاص فيك…و حتى لما يصير عندك رأي خاص رح تلاقي انو هالمحللين السياسيين من دمشق هنن مالهون لا عم يحللو و لا عم يحرمو..

هلأ شلون بدك يصير عندك رأي…..انا رح اعطيك الوصفة…مجربة…..و بيلزمك المواد التالية:

– مخ

– منطق

– كمبيوتر

– واقعك

– رشة حقائق

طريقة التحضير:

بتستعمل كمية كبيرة من واقعك…طفولتك و حياتك اليومية و كلشي عشتو بسوريا و قصص سمعتها من ابوك و امك و رفقاتك و شغلات صارت معك..بتخلطها مع شوية مخ..و بتحاول تميز شو وجعك انت كسوري….الخلطة يلي بتطلع معك المفروض تكون سميكة لانها رح تكون اساس الرأي تبعك….يعني لازم لما تصير الخلطة لازم تعرف شو مشكتلك انت كسوري…شو وجعك..شو الشي يلي ناقصك…شو الشي يلي بتتمنى تشوفو غير ببلدك..بحياتك..بواقعك…بتتطلاعاتك

بعدين بتجيب هالخلطة..بترش عليها شو حقائق المفروض تكون متوفرة بأي مطبخ سوري…متل انو هل انا مشكلتي بالبلد طائفتي…هل انا يوما لزمني واسطة لاسقف غرفة عالاسطوح و اتجوز فيها بس لاني مسيحي او سني او علوي… و لا انو يا ترى انا ما اخدت الشغل يلي بدي ياه بسبب طائفتي و لا بسبب واسطتي…هل يا ترى في مين سارق البلد و لا البلد وضعها تمام……هل يا ترى انا بخريط اذا استدعوني على فرع امن دولة و لا لاء…..و بعمل عشرين تلفون و بودع عليتي لانو احتمال ما ارجع……هل يا ترى انا عشت طول عمري خايف من خيالي يسمعني عم اعترض او اشتكي على شي مو عاجبني بالبلد.. هل يا ترى انا من خلال عشيتي اليومية بشوف مظاهر سلفية بمجتمعي لحتى صدق انها سيطرت عالبلد….يعني في كتير من بهارات الحقائق موجودة ممكن اي واحد مننا يلاقي كتير منها بتلافيف مطبخو…

متى ما رشينا هالحقائق على هالخلطة..و حركناهون شوي… صفنا شوي…و اطلعنا فيهون…بيطلع معكون عجينة …. اخت الوضع بهالبلد…

هالعجينة المفروض وين ما زتيتوها تلزق و تعلم…يعني من وين ما طلعت عالوضع رح تلاقيه بي….ري…فساد و اقتصاد و سرقة و ذل و خوف و انعدام امل للمستقبل و خوف من مليون قصة…عجينة بت…ري قد ما بتتصور…

هلأ حط هالعجينة يومين….و خليك عم تراقبها و تصفن فيها…

بعدين متى ما صارت العجينة صلبة و محددة المعالم بالنسبة الك..بيصير وقت تحضير التوبنغز…

بتجيب هالكمبيوتر و بتعصرو و بتنزل كلشي فيه فيديوهات عالنت….بيجوز يشر مقالات و تحاليل و تعاليق و زبالة…كبهون حاليا منشان ما تنزع الطبخة…بدك بس الفيديوهات..هلأ في اشاعة بالسوق على انو في ماركة فيديوهات مضروبة…..فمنشان هيك بدك تعرف تنقيهون والا اذا بتطبخ رأيك على كذبة…بيحترق بيت ولادك بالمستقبل… على كل انت ما بيهمك…جيب كل الفيديوهات…من كل الماركات….من كل المحلات…..وين ما بتلاقي فيديو زتو بهل الخلطة…بس اهم الشي تكتر فيديوهات…..و تحاول تصفي الزبالة…هلأ رح اعطيك شوية تيبس على كيفية اختيار الفيديوهات…يعني شو الشغلات يلي بيهمك تنتبهلها

– التحريف..بيكون انو واحد يحطلك فيديو مصور ببيروت او بالعراق و بيقلك هادا بسوريا…هلأ و انت عم تشوف فيديو اذا سمعت كلمات متل جيش المهدي او يسقط كاسترو مثلا..معناها الفيديو غالبا مضروب و احيانا ناقل هالفيديو قد يكون نقله عن جحشنة..او قصد..بس انو منعطيه عذر منقول جاهل و ما بيعرف…بس ما نلغيه كمصدر..

– الفبركة …اخطر عالطبخة من التحريف…لانو ببساطة هو خلق شي مالو موجود و الادعاء انو موجود و تمكنت الكاميرات من التقاطه عنوة…هلأ هدول الفيديوهات صعب كشفهون…و طبعا لتعرف عن الفبركة لازم تعرف انو فبركة مقطع فيديو مدتو ثواني بشكل انك تغير الصور و تضيف عالم و تغير عالم بياخد ساعات من الايديتنغ…وهو شي مالو سهل و استوديوهات هوليوود بتدفع ملايين على معدات ايديتنغ و عالم بتعرف تساويها…..فمنشان هيك بمجرد ما تلاقي فيديو مفبرك…اول الشي بتساوي بتبطل تعتمد هالمصدر لاي معلومة منشان تستعملها بطبخة الرأي تبعك……هلأ لوضحلك فكرة الفبركة…رح اعطيك مثال هالفيديو هاد
http://www.youtube.com/watch?v=ByAWZb_eZvY&feature=player_embedded

علي الصوت و سماع الضوجة يلي بتطلع بالثانية 11 و بالثانية 30 و بالثانية 50 و بأخر كم ثانية بالفيديو…..رح تسمع نفس صوت الموتور عم يتكرر خلال ثواني من هالفترات…..يعني متل لما بتسجل صوت مدتو عشر ثواني و بتخليه ينعاد بشكل متكرر…فهل الشي معناها هالفيديو ملعوب بأسفلو..و الاصوات مركبة تركيب عالفيديو……و بالتالي بتكبو و بتكب يلي باعك ياه..هلأ الهدف من هالاكتشاف مو انو و الله مافي مسلحين بالبلد…..بس الهدف هو انو تقدر تميز انو هالفيديو كذبة و في مين عم يكذب عليك…و الاهم انك تعرف مين عم يكذب عليك..

بعد ما جمعت الفيديوهات السليمة..لازم تصفيها من الشوائب يلي ممكن تكون علقانة براسك…واحسن الشي هو انك تجيب مصافي المنطق…و تحديدا استعمل هالمصافي هدول:

مصفاية المؤامرة…هالمصفاية بتصفيلك واقع البلد…و بتوضحلك انو سوريا مالها على وشك احكام سيطرتها على العالم…و بالتالي مفهوم المؤامرة الدولية المتعددة الاطراف و الجهات..هو مفهوم مالو منطقي…و بيقلك انو الدولة مالها ممانعة لانك مافيك تكون ممانع و مقاوم و حدود عدوك معك بتزت الدبوس فيها بتسمع صوتو……و اذا بدك تتأكد..رش شوية من تصريحات رامي مخلوف او تصريحات كتير من صحفي و مسؤولين باسرائيل و ردة فعل اللطيفة من اميركا تجاه رأس النظام بتلاقي انو سوريا بوضعها الحالي احسن من اي وضع تاني بالنسبة لكتير دول اولها اسرائيل…و بالتالي اذا جارك مرتاح منو..ليش تغيرو؟

مصفاية الثورات العربية…هالمصفاية رح تصفي الشوائب يلي عم تشوفها بعيونك و تقدر تربط واقعك و ظروفك و تشبهها بالمصاروة و التوانسة و اليمنية و الليبية..و تشابه الظروف و الامال تبع هالشعوب ممكن تكون هي يلي حركت الموجة الثورية..مو المؤامرات الدولية الخفية…

مصفاية الله ما انشاف بالعين بالعقل انعرف….هالمصفاية بتخليك تشوف انو اذا مثلا الحكومة السورية عم تقول قصة و مسلحين و عصابات..بس بنفس الوقت عم تمنع اي صحفي من اي دولة بالعالم بالدخول للمناطق يلي عم يقولو فيها مشاكل…ما عدا قطع التلفون و الكهربا..و ممنوع اي مصور يفوت……و لازم تصدقكهون على الرغم من انو قبل هلأ باعونا فيلم مفبرك….فهل المصفاية بتخليك تقول انو معناها في ان بالموضوع…انا لما ما عندي شي خبيه..ما بمنع البشرية يشوفو شو عم ساوي…و خصوصا مثلا اذا بتتفركش بهيك فيديو
http://www.youtube.com/watch?v=k3F-YBtcMIU&feature=player_embedded

مصفاية حارتنا ضيقة و منعرف بعض…..هالمصفاية بتصفي الشغلات يلي كلنا منعرفها من جرائم صارت بسوريا على ايدين النظام….و بتخليك تتذكر قصص الشبيحة يلي بتعرفهون بالساحل…و بيذكرك انو انت بتعرف انو المخابرات عم تعد انفاسك و انفاس الكل فشلون كل هالعصابات…بعدتها و عتادها و توزعها الجغرافي…و بقدرتها على التخفي عن عدسات الكاميرات و لا يراها الا المخابرات…قدرت تساوي كل يلي ساووتو……بس الاهم..بيخليك تميز اجرام النظام ووساختو بحقنا..

..مصفاية الدين…هالمصفاية بتفلتر كل الشوائب الطائفية…بتورجيك انو العناصر الطائفية شاذة على الرغم من انو كتير عم يحكو عليها و يبالغوها و يضاعفوها بس بدون دليل..بأستثناء رواية اوقصة او حتى اشاعة قد يكون هدفها تهويل او تحريض و يمكن حتى تخويف..

مصفاية المعارضة….بتشفي المعارضة و بتكشفلك انو المعارضة المزعومة بالخارج المقصود فيها خدام او الاخوان هنن ورقة يابسة…اي نعم في اخوان..بس هنن اخوان..متلهون متل الرفاق…في المنيح و في العاطل…علما انو مافي اعطل من النظام..

متى ما صفيت الفيديوهات و صارو نضاف براسك…بتحطهون على العجينة…..و بتنام

تاني يوم بتفيق و يمكن يصير معك مغصة..و حتى يمكن حرقة بالبول…بس ما بعرف هاد شو ممكن يكون سببو..بدك تشوف دكتور….بس كمان رح تلاحظ انو صار عندك رأي شخصي…….بتلاقي انو صار عندك امكانية تتفرج على كل الاقنية العميلة و الصديقة و تعرف تميز بين الكذب و العلاك بدون ما حدا يقلك شو تشوف و شو تتابع……بتصير فيك تشوفر بالريموت كونترول و انت عرفان وين الله حاطك…و يمكن حتى تزت الريموت و تحمل حالك و تطلع تتظاهر…و بيجوز يقوصو عليك…بس ما رح يهمك..لانك رح تعرف اخيرا مين يلي عم يكذب عليك..و تشوفو بعينك….و تقلو حاجة كذب و فرقنا بريحة طيبة…..و رح تتمنى لو هالوصفة كانت متوفرة من زمان…ومعدتك يمكن تتعود عالحرية…..و لما بتدوق الحرية..ما رح تقبل ترجع لمحل ما انت هلأ…لانو بدك ولادك يدوقوها و يعيشوها و تصير تحصيل حاصل بزمنهون…