بالفيديو- غادة عبد الرازق تنهار بالبكاء في لايف جديد : كنت في حالة هذيان وأنا آسفة جدا.. وأنا طول عمري ست محترمة وهفضل محترمة

فاجأت الممثلة المصرية غادة عبد الرازق متابعيها عبر مواقع التواصل الإجتماعي بفيديو جديد تعترف فيه بأنّها السبب وراء الفيديو الذي أثار الجدل قبل أيام، واعتذرت من جمهورها مؤكدةً أنّها كانت تحت تأثير الدواء.

وقالت عبد الرازق فى البداية “مش هقول إنها أزمة ، هو امتحان من ربنا، أنا طالعة للناس النهاردة أقولهم ، إن أنا غلطت فعلاً وأنا آسفة جدا، آسفة لجمهوري وآسفة للناس وآسفة لبلدي وآسفة لفني، وحياة أولادى إنى عمرى فى حياتى ما قصدت إنى أقلل من نفسى أو أعمل حاجة غلط، أنا مكنتش سكرانة انا ست بتعالج بقالى حوالى 22 سنة، باخد أدوية”.

وأضافت عبد الرازق “أنا بقالي 26 سنة بحترم نفسي واسمي وبلدي وكل حاجة حواليا، عمري في حياتي ما غلطت، وأنا مش ملاك، انا يومها غلطت في إن أنا كنت طول اليوم تعبانه وطول اليوم من الساعة الواحدة ظهراً في الجزيرة ورجعت أخذت الأدوية بتاعتي النفسية ومعروف إنها بتعمل حالة هذيان شوية وأنا أقسم بالله مشوفتش من الكومنتات إن في جزء مني بان، وأكيد مش قاصدة وانتو متأكدين، وكل دا أنا بعمله علشان روتانا بنتي، وعلشان أحفادي، وعلشان جمهوري ، وعلشان اول مرة احس إن بعد 26 سنة انا قد اية بتحارب وفي ناس مش بتحبني ، وفي ناس مستنيالي الغلط، وبقولهم أذيتوني وكتر الف خيركم وحسبى الله ونعم الوكيل وكل واحد عنده اهل واولاد”.

وأستكملت ” انا بقول لجمهورى انا بحبكم وبقالى 26 سنة بحفر فى الصخر وضاعت مني حياتى كلها، وفكرت كتير اطلع اللايف دا ولا مطلعوش، بس أنا صريحة طول عمري، ناس كتير قالتلي قولي يا غادة إنه متفبرك، أنا مش عارف اقول مش مصدقة الكذبة مش قادرة أصدق الكذبة، أنا بجد مش بشوف الكومنتات من قريب، والى بعتولى وقالولي ان في جزء باين منى انا مكنتش شايفاهم لانى مبشوفش من قريب، على قد ما كنت بحبكم قوي على قد ما مكنتش متخيلة إن الضربة هتيجي جامدة اوي كدا”.
وتابعت غادة: ” ودي الرحلة الوحيدة إلي مرضيتش اتصور بمايوه وكنت واخدة قرار مظهرش كدا تاني، ومعرفش اية الي حصل فيها، والفانز ساعتها كلموني وقالولي اطلعي لايف، وانا زي الهبلة طلعت لايف، انا بس طيبة ودا غلط اوي في الزمن دا اني ابقى طيبة”.

واستطردت “دخلت السرير والدواء النفسي اشتغل معايا الدواء النفسي بيدوخ وينيم، وبكلم الفانز بتاعي ومخدتش بالي ونمت وصحيت على فضيحة فى العالم كله، تفتكروا إن أنا كنت مستنيه أعمل دا بعد 26 سنة عشره ، وبعد كل النجاح دا مستنيه اعمل دا”.

واختتمت كلامها “اقسم بالله أنا ما عارفه أقول إيه ، أنا بس هقول كلمة واحدة أنا طول عمري ست محترمة وهفضل محترمة ، علشان الجمهور اللي أنا بحبه، وعلشان بنتي روتانا وعلشان أحفادي، وعلشان أنا ست بمثل بلدي اللي هي أهم بلد فى العالم، غصب عن عين اي حد في الدنيا، انا اسفة وواعدكم انها مش هتتكرر مني تاني على اي صعيد في الاحوال ، وآنا اسفة ويارب تقبلوا اعتذاري”.