وجهت كلودا، إبنة شقيقة الفنانة الراحلة صباح، رسالة مؤثرة وطويلة الى محبي الشحرورة، كاشفة عن تفاصيل إضافية قبيل ساعات من رحيل خالتها فجر أمس الأربعاء، حيث كانت كلودا تهتم بها طوال الفترة الماضية في إقامتها في فندق “برازيليا كومفورت”.
وكتبت كلودا في رسالتها التي ننقلها لكم حرفياً:”يا اصدقاء الصبوحة الطيبين…يا احباب الشحرورة المخلصين… ما تزعلوا وحتى لو كان الزعل كتير كبير…افرحوا انو الصبوحة كانت وما زالت تاريخ للتاريخ…محبتها الكن ما كان الها مدى… وكانت تقلّي ما بريدك يا كلودا تخبريهم اخبار تزعجهم ودايماً خليهن فرحانين، الدنيا ما فيها شي حرزان… واذا شي يوم رحلت من ها الدني اوعى يزعلوا وينقهروا… خليهم يفرحوا، لان تركتلهم ارث كتير كبير من الاغاني والمقابلات والافلام والخبريات، بتقدر تشغلهم لمدى الحياة…”.
أضافت في رسالتها :”يا اصدقاء الصبوحة الأحباب، انا بعتذر اني خبرتكم مبارح الصبح ابشع خبر ممكن تعرفوه، بس كان لازم تعرفوه منّي تتقدروا تصدقوه… وسامحوني لأني مش عم بقدر ردّ على رسايلكم العزيزة عا قلبي، لأن قلبي وعقلي آخدتهم الشحرورة معها… بوعدكم اني رح ابقى خبّركن امور كتيرة عن صبوحتنا ما بتعرفوها ورح تحسّوا انها بعدها معنا، بس اعطوني شوية وقت تا اعرف ودّعها متل ما لازم…”.
وتابعت :”مبارح راحت الصبوحة الساعة 3 الصبح من دون اي كلمة ومن دون شكوى، غدرتنا وغادرتنا عالسكت وكانت نايمة متل الملايكة وهيبة الله عا وجها… وقبل بكم ساعة من الرحيل النهائي، قالتلي فيه عبقة عا صدري ، ركضت وجبتلها الطبيب ، ومن بعد ما تم فحصها، طلع الاوكسيجين 98 ونبضات القلب بتجنن وضغطها 12 عا 7 والروايا متل الفل… “.
وأردفت ابنة شقيقة الصبوحة كلودا في رسالتها :”يا احباب الشحرورة، قدرة الله فوق كل البشر … متل ما كانت تقللي الصبوحة دايما:” شوفي يا كلودا، كل انسان بتخلق قصّته معه! ما تبحثي، يللي مقّدره الخالق مش عند حدا”.
وختمت قائلة :”اكبر شكر من الصبوحة الكن، لمحبتكن واخلاصكن وثقتكن فيها..وبدوري بدي اشكركن كلكن..بدي اشكر كل وسائل الاعلام… بدي اشكر كل يللي وقفوا الى جانبي والى جانب العائلة..بدي اشكر كل انسان شارك بعاطفته وبقلمه وبفكره على الصفحات المختلفة على الفيسبوك..يا احبابي…بتمنى تتذكروا دايما وصية الشحرورة وتسمعوا الاغاني وتفرحوا معها وتصلوا لروحها الطيبة”.