عمرو مصطفى عن شيرين :”الوسط الفني يحتاج إلى الرقي لأن الفنانين قدوة”

رد الفنان المصري عمرو مصطفى على هجوم النجمة شيرين عبد الوهاب عليه ووصفها له بأن صوته “وحش” جدا.

وقال عمرو في مداخلة هاتفية له في برنامج “حضرة المواطن” مع مقدم البرامج سيد علي إن بداية ما حدث هو “أن شيرين ظهرت بعد ثورة ٣٠ يونيو مع الإعلامي عمرو الليثي وقالت عني إن صوتي وحش، وأنا مردتش، وبعد كدا أنا ظهرت في برنامج مع المذيعة وفاء الكيلاني وعرضت فيديو لشيرين وهي بتتكلم عني، فكان ردي عليها إن أحنا كنا عاملين أغنية اسمها (جنودنا رجالة) وشيرين كانت عايزة تغني الاغنية دي وخليتها تغنيها، بس الاغنية منجحتش لأن الأغنية كانت محتاجة راجل يغنيها”.

وتابع: “هي تدخلت في حاجات مينفعش تتدخل فيها ولا تقولها، وأنا فاكر الوقت اللي جابولي فيه شيرين وقالولي يا عمرو ياريت تسمعها وكنت أنا بلحن من ١٠ سنين، فتخيل أما يكون حد مش مصدق أنه واقف قدامك يطلع يقول كده عليك”.

وأكد عمرو مصطفى خلال حديثه أن الوسط الفني يحتاج إلى الرقي لأن الفنانين قدوة للشباب: “إحنا محتاجين الوسط الفني يبقى وسط راقي، الفن رسالة وبقينا كفنانين قدوة للشباب، ولو عاوزين نصنع بلد ووعي جديد اختار الفنان الاصيل، ودا مش عيب في شيرين، المشكلة مش عيب في حد لأن مش هتقابل الإساءة بإساءة، بس إحنا محتاجين نحط نقطة خطر لأن الفن لو أصبح غابة الشعب كله هيبقى غابة”.

وفي نهاية حديثه أعلن عمرو مصطفى أنه سيقدم أغنيته “مشربتش من نيلها” و”جنودنا رجالة” بصوت شاب جديد، وطالب وزارة الثقافة والقائمين على الفن باختيار أصوات شابة من المدارس والجامعات والمراكز الثقافية، وتدريبها وتحضيرها بطريقة جيدة لتكون بعد ذلك قدوة للأجيال الجديدة.