انتقد الفنان محمد محمود زملاؤه بالوسط الفني بسبب غيابهم عن حضور جنازة وعزاء الفنانة شيرين الطحان، التي رحلت عن عالمنا منذ أيام بعد صراع مع مرض السرطان عن عمر ناهز 47 عاما .
قال محمد محمود في تصريحات لموقع “اليوم السابع” أثناء تواجده بالعزاء: “لا تعليق، اللي يشوف كم رسايل العزاء على وسائل التواصل ميشوفش كم الحصور سواء في الجنازة أو في الدفنة أو في العزاء” .
تابع: “أنا كتبت رسالة على الصفحة بتاعتي قولت (لكي الله يا شيرين .. ربنا يجعل كل لحظة ألم في ميزان حسناتك .. إنا لله وإنا إليه راجعون)” .
وعن منشورات نعي شيرين الطحان على السوشيال ميديا من جانب الفنانين، علق قائلا: “كلام كتير، فعل لأ .. احنا كنا في الدفنة نعد على أصابع اليد الواحدة، قولت الناس صيام، عندهم ظروف هيجو بليل العزا، أهي القاعة مفيش حد” .
أضاف محمد محمود متحدثا عن الفنانة الراحلة: “شيرين مريضة بقالها سنين من 2016 أو 2017، وكانت علاقتها بالوسط مش قريبة ومحدش كان يعرف بمرضها .. أنا لما كنت بمثل معاها مسلسل رمضان كريم مكنتش أعرف إنها عيانة” .
واصل: “أنا معرفتش إلا متأخر جدا وحاولت أتواصل معاها في الأيام الأخيرة اعتذرتلي إنها مناعتها ضعيفة جدا ومانعين عنها الزيارة وقالتلي إن شاء الله لما ابقى كويسة لازم تيجي” .
أكمل الفنان محمد محمود: “أنا مستاء جدا من عدم الحضور سواء في تشييع الجنازة أو في العزاء، القاعة فاضية .. شئ غريب، كلام كتير وفعل مفيش .. الناس اللي بتيجي العزاءات علشان تتصور لقوا إن هنا مفيش الكلام ده” .