ملحم بركات في تصاريح نارية: البلد ما في رجال..والفنانين عم يصلوا حتى ما صير وزير الثقافة

في حلقة جديدة من برنامج الموريكس دور عبر إذاعة جرس سكوب استضافت الاعلامية هلا المرّ والاعلامي نيكولا داغر موسيقار لبنان ملحم بركات الذي اطلق تصاريح نارية وتحدث بأمور فنية وسياسية وعن الوضع اللبناني الراهن.

بداية اعلن الموسيقار انه يتواجد حالياً باستوديو طوني سابا حيث يقوم بأعمال فنية عديدة ويحضر لأغنيات جديدة من المقرر طرحها قريباً، وعن تكريم الموريكس دور له هذا العام ومشاركته بالحفل قال بركات: “انتو بدكن اني شارك؟ الموضوع ما بعرف شو رح يصير فيه رح احكي انا وجو معلوف بالموضوع.. وفي كتير فنانين بجمّلوا السهرة“.

ورداً على سؤال عن الفنانين الذين يقدمون اغاني باللهجة اللبنانية قال بركات: “الفنانين الجدد كمان عم يغنوا بغير اللهجة اللبنانية.. انا كل فنان بغني باللهجة اللبنانية بحطو على راسي”.

وعن الاغنية الجديدة مع الفنانة شذى حسون أكد بركات ان الموضوع انتهى “الاغنية مش ظابطة في اشكالات عليها بسبب التكاليف وعملوا خلاف هني وطوني سابا..” وعن رأيه بصوت شذى حيث كان قد صرّح سابقاً انه اهم صوت بالشرق الاوسط قال: “ما كتير راضي عن شذى ما عم تهتم بصوتا وعم تشرب أرجيلة”.

اما عن اصوات كل من ماجدة الرومي ونجوى كرم قال بركات: “اصواتن أحلى اصوات بالعالم كلو.. ماجدة الرومي من اهم الاصوات بالعالم.. ونجوى ما بدي احكي عنا لأن قد ما احكي ما في كلمة شكر منها”.

وعن الاعلامي جو معلوف وبرنامج “انت حر” قال الموسيقار ” ولا مرة فوتت حلقة من برنامج انت حر لان ما حدا بيتجرأ لهيك مواضيع.. البلد بدو رجال ما بقى في رجال”.

وفي السياسة اعتبر بركات ان البلد مقسماً والفتنة موجودة “كل طائفة من الطوائف بدها تعمل قانون انتخابي على ذوقها.. وكل واحد خايف ما يربح بيطلع يعارض على القانون.. كل واحد بدو مصلحة حزبو..”

واضاف: “إذا بجي أنا وزير ثقافة ببطلوا الفنانين يناموا الليل وهني عم يصلوا حتى ما صير وزير.. ما بدي قول شو بعمل إذا صرت وزير لأن بتقوم قيامتن”.

وتابع بركات حديثه مع المرّ وقال: “هيدا الشعب مش ممكن يتوحد لأنو كلو غلط بغلط.. اوقات الشخص بيكفر بطائفته.. من ايمتى الدول العربية بتقول لرعاياها ما تجو على لبنان؟ ما شي ظابط لا الفن ولا السياسة ولا الاقتصاد”.

أما عن التعاونات والاعمال الجديدة فأعلن الموسيقار انه بصدد التحضير لأغنيات ومواضيع جديدة “عم سجل 8 أغنيات رح خلي بعض الفنانين ينسوا أسماءهم.. وفي أغنية جديدة مع فيفيان مراد ومع هشام الحاج رح يحققوا نجاح كبير”.