ردود تُحــــطِم

مرسلة من صديقة نورت Na-Na EGYPT

سلام عليكم يا أحلي أعضاء
جايبالكم موضوع فاااني خفيف الدم يغير شوية من مودكم.
قريت الموضوع وعجبني وقلت أخليكم تشاركوني قرائته.
هي فعلاً ردود مُحطِمة بكل معني الكلمة ، ولكنها خفيفة الدم .
أتمني يعجبكم ويرسم البسمة علي وجوهكم بإذن الله.
لقد جفت اقلامي *
((بسيطة نشتريلك واحد جديد))
وتكسرت مجاديفي*
((حاول تعوم أو خليك في القارب لحد ما يجيلك حد يساعدك))
سأبقى هنا حتى مغيب الشمس*
((إخزي الشيطان يا بني وإلحق روح ع البيت قبل الضلمة))
لن أدع الأحزان تأخذني*
((تاخدك تعمل بيك إيه !! جاتك نيلة،ده إنت متسواش قرش))
لقد أبحرت وعبرت المحيطات بدون قارب*
((بلاش كدب بئا، ناقص تقول عبرتها سباحة علي ضهرك))

لقد جمعت آهات الحزن وحنين الألم*
(( والله شاطر بتعرف تجمع، وطلع الناتج كام ؟))
كنت أتأمل أوراق الخريف وهي تسقط وتتناثر*
(( مفكرتش تجمعها هي كمان مع إخواتها آهات الحزن وحنين الألم؟))

إنّي أسمع تكسرات عظامي*
((آها طبعاً عشان مبتشربش اللبن ، البيبسي والديو بهدلوك))

إن عظامي تتكسر وتتهشم*
((أكيد عندك صداع في العضلات))
انظر هناك خلف الأفق*
((نظرنا ومشفناش حاجة،مستني حد ؟))
هناك حيث الأمل وحيث الحياة*
(( قاعدين لوحدهم ؟ ولا فيه معاهم محرم ؟))
انظر إلى تلك الفراشة اليافعة النحيلة الهزيلة وهي تطير*
((مقضّيها انظر انظر..خليتني فكرتها بتعوم !! ))
سوف أعلن للعالم*
((إعلن بس الله يخليك بصوت واطي ، عايز أنام ))

سوف أعلن للعالم أن الإبداع قد مات*
(( مات !!! والنبي ده كان صغير))
سوف أعلن أن هناك من يقتل الإبداع*
(( إذا إنت الإبداع ، يبئا قتلك حلال ))
سوف أقف أمام كل الأعداء*

((الله يقويك يا بني ،أقف بس حط جمبك كرسي عشان لما رجلك توجعك))

من قال أن الإبداع مات؟*

(( لا إله إلا الله ، إنت قلت من شوية ولا عندك زهايمر ))

سوف أُريهم مَن أنا، أنا القلم الحر*

(( حر !! ليه يا ضنايا كنت مسجون ؟؟))

 

سوف أكتب في كل مكان* ((بس الله يخليك شخبط بعيد عن الحيط زي ما قالتلك نانسي))
أما زالت أقلامي جافة؟؟*
((والله قرفتنا إنت وقلمك،خدلك قلم رصاص وريحنا ))
سوف أحقق كل أهدافي*
(( بس خد بالك لا تطلع تسلل))

ماقد بنيته بالأمس لن أهدمه اليوم*
((اطمن البلدية هي اللي هتهدمهولك بعون الله))

سوف تبقى إبداعاتي تدوم وتدوم وتدوم*
(( دي دعاية عن صابون فيري ؟؟ ))
نحن لا نفهم*
((اتكلم عن نفسك من غير تعميم ،عارفين إنك طول عمرك غبي))
كل المواضيع التي لاتحمل معنى فهي ليست إبداع*
((متأكد من الكلام ده ؟؟))
نعم متأكد بس من قال لك هذا؟؟*
((سلامة عقلك _إحترس من الحشيش ضار بالصحة_من الصبح عمّال تقول ، ودلوقتي تقولّي مَن قال لك هذا ؟ ))

مَن قال أن الكلام الذي بلا معنى ليس إبداع ؟*
((يوووووووه والله إنت اللي قلت ))
كنت أمزح*
((والله ؟؟ ده إنت بني آدم سئيل ))
دعنا نكمل*
كل الأيام متشابهة ولكنها تختلف في الأسماء
((مظبوط ، كلام سليم ))

كذلك السنين متشابهة*
(( بس السنين ملهاش أسماء ، يعني قلنا كلامك سليم قومت صدقت نفسك ؟؟ ))

كذلك الوجوه متشابهة*
(( آه طبعاً ده أكيد في الصين،الأخ باينّه صيني ))

لو كنت أقف بجانب هذا الزمان الصعيب لكنت شبيه له من كثر أحزاني*
((خليك مكانك متتحركش ، هاخدلك مع الزمان الصعيب بتاعك صورة تشيييييز ))

يا أخ يا بتاع الأقواس اتكتم وخلينا نوصّل المعنى للإخوة الأعضاء بدون تريقة*.
كنا فين ؟؟ آه إفتكرت
عندما تأتي بكل الحب وتقدمه للأخرين ثم تنصدم*
((امممم عارفك متسرع ، أكيد كنت ماشي بسرعة وقطعت الإشارة ))
وقتها تعرف أن الحب بين الناس قد ضاع*
((طب يعني عايزني أجيبلك حد يدور معاك ؟))

لقد تشربت عروقي من اليأس والأحزان*
وبدأت مدامعي تنهمر مثل الأمطار
((أعوذ بالله،اللهم حولنا لا علينا))
بعد هذا الجهد والعناء سوف أقف على قدم وساق*
((والنبي متنساش الكرسي إياه ،مصيبة يجيلك زهايمر في المفاصل كمان))
سوف أقف وأبتسم في وجه الأيام الحزينة*
((والله ما بئت حزينة إلا منك))
وأقول لها*
((بتقول لها بشويش ولا صراخ كالعادة؟))
لا بشويش*
سوف أقول لهذة الأيام الحزينة إرحلي
((طب حجزتلها أوكي ولا هتخليها إنتظار ؟))